वामदेव सहित खुइम्ह नेतातय्सं प्रमया राजीनामा माग
सत्ता रुढ नेकपा (एमाले)या उपाध्यक्ष वामदेव गौतम सहित खुइम्ह नेतातय्सं प्रधानमन्त्री माधवकुमार नेपालं राजीनामा बीमाःगु धासें एमाले अध्यक्ष झलनाथ खनालयात ज्ञापनपत्र लःल्हाःगु दु । प्रधानमन्त्री नेपालं वर्तमान गतिरोधयात निकास बीमफुगु धासें प्रधानमन्त्री नेपालं राजीनमा बियाः देय्यात निकास बीमाःगु खँ धाःगु दु ।
ज्ञापनपत्रय् संविधान नं इलय् जारी मजुइगु व शान्ति प्रकृया नं निष्कर्षय् मथ्यनीगु अवस्था ब्वलंगु अवस्था वःगुलिं प्रधानमन्त्रीं राजीनामा बीगु हे उचित जुइगु खँ धाःगु दु । अथेहे प्रधानमन्त्रीं शनिवाः देय्या नांमय् याःगु सम्बोधनं राष्ट्रिय सहमतिया वातावरण दयेकेगु स्वयां देय्यात मुठभेड पाखे यंकेगु संकेत याःगु खँ न्ह्यथंनातःगु दु ।
थंज्याःगु राजनीतिक जटिल अवस्थाय् प्रधानमन्त्रीं राजीनामा मबीगु देय् व पार्टीया निंतिं घाटक जुइगु धासें प्रधानमन्त्रीया राजीनामाया वातावरण दयेकेत अध्यक्ष खनालया ध्यानाकर्षण याकूगु दु । ज्ञापनपत्र शनिवाः हे लःल्हाःगु खःसां आइवताः जक सार्वजनिक जूगु खः ।
ज्ञापनपत्रय् उपाध्यक्ष वामदेव गौतम, केन्द्रीय कमिटीया दुजःत साहना प्रधान, किरण गुरुङ, राजेन्द्र श्रेष्ठ, राधा ज्ञवाली, परुश्रुराममेगी गुरुङ व रामपृत पासवान लगायत खुइम्ह नेतातय् ल्हाःचिं दु ।
