कार्यदलया बैठक निष्कर्षबिहीन
स्वंगू दलीय कार्यदलया बैठक बिना निष्कर्ष क्वचाःगु दु । सहमति मालेत शनिवाः सनिलय् हानं च्वंगु बैठकय् माओवादी लडाकु समायोजन व राष्ट्रिय सहमतिय सरकारया बारे खँ मिलेमजुइवं निष्कर्षबिहीन जूगु खः ।
बैठक लिपा माओवादी उपाध्यक्ष डा. बाबुराम भट्टराईं कांग्रेस व एमालें स्वाःया दुने माओवादी लडाकु समायोजन यायेमाःगु प्रस्ताव हःगु तर माओवादीं थंज्याःगु गम्भीर विषयलय् उली याकनं क्वचायेकेत सम्भव मजूगु धासें असहमति प्वंकूगु धयादिल ।
अथेहे वय्कलं सहमतिया निंतिं माओवादीं प्रधानमन्त्री माधवकुमार नेपालं न्हापा राजीनामा बीमाःगु धकाः तःगु प्रस्तावय् कांग्रेस व एमाले सहमति मजूगु धयादिसें प्रधानमन्त्री नेपालया राजीनामा मवतल्ले सहमति जुइमफइगु धयादिल ।
शनिवाः सुथय् च्वंगु स्वंगू दलया बैठकय् खुगू बुँदे एजेण्डा मध्ये झिंनिगू बुँदे सम्झदारी निसें पुलांगु सम्झौता व सहमतिया समिक्षा व कार्यन्वयन, विश्वासया वातावरण निर्माण यायेगु, राष्ट्रपतिं ल्ह्वंगु पलाः नापं शान्ति प्रकृयाया बारे सहलह जूगु व उगु प्यंगू विषयलय् सहलह सकारात्मक जूगु खँ भट्टराईं धयादीगु खः ।
सनिलय् न्हय्ताः इलंनिसें येँया लाजिम्पाटय् च्वंगु होटेल र्याडिसनय् च्वंगु बैठकय् उद्योग व्यवसायीतय्सं नं सहमतिया निंतिं मध्यस्तकर्ता या:गु खः । बैठकय् सहमति मजुइवं माओवादीं कन्हय् निसें देय्न्यंक आम हड्ताल याइगु जूगु दु ।
बैठकय् माओवादीया उपाध्यक्ष डा. बाबुराम भट्टराई व वर्षामान पुन 'अनन्त', कांग्रेस पाखें महामन्त्री विमलेन्द्र निधी, डा. रामशरण महत व कृष्ण सिटौला, अथेहे एमालेया महासचिव इश्वर पोखरेल, प्रदीप ज्ञवालीया ब्वति दुगु ख: ।
