'बहुमत प्राप्त जूगु सरकार विधि सम्मत ढंग जक विघटन जुइ'
आन्दोलन लितकया सहमतिलय् वयेत माओवादीयात इनाप
प्रधानमन्त्री माधवकुमार नेपालं विधि सम्मत ढंगं गठन जूगु बहुमत प्राप्त सरकार विधि सम्मत ढंगं जक विघटन जुइगु खँ धायदीगु दु । वय्कलं सरकार परिवर्तन हे आःया दकलय् महत्वपूर्ण खँ जूसाः झीसं हे अवलम्बन यानाःगु लोकतान्त्रिक पद्धती कथं वयेत माओवादीयात इनाप यानादिल ।
शनिवा: सनिलय् देय्या नांमय् सम्बोधन यानादिसें प्रधानमन्त्री नेपालं सतक व धम्की पाखें मखसें सहमति व लोकतान्त्रिक पद्धती पाखें समस्या समाधान जुइफइगु धयादिसें माओवादीयात आन्दोलन त्वःता सहमतिलय् वयेत इनाप यानादिल ।
संविधान निर्माणय् गम्भीर अवरोध खनेदुगु धयादिसें प्रधानमन्त्री नेपालं उकी संविधानसभाया दकलय् तःधंगु दलं थःगु हे नेतृत्वय् सरकार गठन मजुइकं संविधान मबीगु व सतकं हे सत्ता कब्जा यायेगु ख्याच्वः बियाच्वंगु धइगु संविधान निर्माणया बाधक जूगु द्वपं बियादिल ।
व्वय्कलं माओवादीं थःम्हं नेतृत्व याःगु सरकारप्रति शत्रुतापूर्ण व्यवहार याःगु व निषेधया राजनीतिक शुरु याःगु धयादिल । वय्कलं माओवादीं वर्तमान सरकारं याःगु गुण दोष मस्वसें थुकीयात अपवित्र धयाः गलत प्रविधि नालाकाःगुलिं हे शान्ति प्रकृयाय् समस्या वःगु दाबी यानादिल । वय्कलं सरकारं शान्ति प्रकृया पूवंकेत बांलागु सुरुवात याःगु धयादिसें यदि माओवादीं शान्ति सम्झौतायात पालना यानाः वंगु खःसा नेपाःया शान्ति प्रकृया विश्वया हे नमुना जुइधुंकीगु धयादिल ।
निर्धारित इलय् हे संविधान निर्माण यायेमफइगु झी सकसियां कमजोरी जूगु धयादिसें वय्कलं थुकीया निंतिं जनता समक्ष आत्मआलोचना यायेमाःगु धयादिल । संविधानसभा पाखें हे न्हूगु संविधान निर्माण यायेमाः धइगु थःगु मान्यता जूगु धयादिसें प्रधानमन्त्री नेपालं दलत दथुइ सहमतिया साथ न्ह्याः वनेगु मार्चचित्र तयार जुसाः थः सहमतिया निंतिं त्याग यायेत तयार जूगु धयादिल । तर वय्कलं देय् अस्तव्यवस्तता जूगु इलय् छुं नं सरकारं त्वःतेमफज्यूगु धयादिल ।
