थौंया जनसागरं मोर्चा माओवादीं बच्छि त्याकेधुंकल : प्रचण्ड
एकीकृत नेकपा (माओवादी) अध्यक्ष पुष्पकमल दाहाल 'प्रचण्डं' नेपालय् तःधंगु त्याग व तपस्या लिपा युगान्तकारी परिवर्तन जूगु धयादिसें आः नं सतकं हे तःधंगु परिवर्तन जुइगु धयादिल । वय्कलं जनतां हे परिवर्तनया सम्भावक जूगु धयादिसें सतकं हे सत्ता परिवर्तन जुइगु धयादिल । वय्कलं सतक आन्दोलनय् दकलय् संवैधानिक व नैतिक जूगु खँ विश्व इतिहासं क्यनेधुंकूगु धयादिल ।
मजदुर दिवसया लसताय् माओवादीं येँया खुल्लामञ्चय् या:गु विशाल जनसभायात सम्बोधन यानादिसें वय्कलं थौंया आन्दोलन नेपाःया इतिहासया दकय् तःधंगु जनसभा व शान्तिपूर्ण, अनुशासित व व्यवस्थित आन्दोलन जुगु धयादिसें थुली ल्याख्य् मनूतय् जनसागरं मोर्चा माओवादीं थौं हे बच्छि त्याकेधुंकूगु धयादिल । वय्कलं कन्हय् येँया दक्वं जनता कुहांवःसा कन्हय् हे आन्दोलन सफल जुइगु दावी यानादिल ।
आः तक येँया जनसमुदाययात राज्य सत्तां क्वतेला तःगु दु धयादिसें वय्कलं येँया जनता उकी नं नेवाः जनसमुदायात मुक्ति बीगु आन्दोलन थ्वहे जूगु धयादिल । वय्कलं स्वनिगःया जनसमुदाय उकी नं विशेष यानाः नेवाःतय्त आन्दोलनय् कुहांवयेत इनाप यानादिल ।
वर्तमान आन्दोलन नेपाःया स्वाधिनता, शान्ति स्थापना, संविधान निर्माण व नेपाली जनतया आत्मनिर्णया अधिकार सुनिश्चिता यायेत जूगु धयादिसें थ्व हिंसा ब्वलंकेत मखसें कर्सीया निंतिं विदेशीया नांमय् चाकडी जुयाच्वंगु व देय्यात गद्दारी यानाच्वंगु दुला धकाः खकरदारी यायेत जनसागर सतकय् कुहांवःगु धयादिल । वय्कलं प्रतिक्रियावादी, प्रतिक्रान्तिकारी व अवसरवादीया निंतिं थ्व आन्दोलन छगू हाथ्या जुयाब्यूगु धयादिल । वय्कलं शान्ति प्रकृया पूवंकेत राष्ट्रिय सहमतिया सरकार आवश्यक जूगु धयादिल ।
प्रचण्डं प्रधानमन्त्री थिम्पुं लिहांवयेधुंकाः सरकारया भाय् पानावंगु व प्रधानमन्त्री लगायात मन्त्रीतय्सं माओवादीया आन्दोलनय् सेना छ्यलेगु धकाः न्ववाःगु धयादिसें थिम्पुं सुयाः आदेश न्यनाः थंज्याःगु भाय् न्ववाःगु खँ जनता थुइकेधुंकूगु दाबी यानादिल ।
विदेशी प्रभुया न्ह्यने क्वछुइगु ई फुइधुंकूगु व आः थःपिं सुंनाप क्वछुइमफु धयादिसें वय्कलं भारत, चीन नापं दक्वं नाप समानताया स्वापू कायम यायेत चाहे जूगु धायादिल । नापं वय्कलं भारतीय नेतातय्सं आः माधव नेपालया सरकारं दक्वं ठीक याइ व नेपाली सेनायात ल्हातेय् कयाः माओवादीयात सीधेयेकीगु बिचाः यानाच्वंगु खःसा आः अज्याःगु खँ सम्भव मजूगुलिं भारतीय नेतातय् अज्याःगु बिचाः मययोत इनाप ।
वय्कलं आःया परिवर्तन संसदया फोहरी कासां वःगु परिवर्तन मखुगु धयादिसें थ्व द्वलंद्व नेपाली जनताया काय् म्ह्याय्या बलिदानं वःगु परिवर्तन जूगुलिं आः सतकय् दुगु दक्वं माग पूमवंतल्ले आः थ्व आन्दोलन दीमखु । वय्कलं नेपाःया दक्वं राष्ट्रवादी शक्तियात नेपाली जनतया आदेश कथं राष्ट्रया निंतिं छप्पँ जुइत इनाप यानादिसें अन्तर्राष्ट्रिय समुदाययात नेपाः छगू युगान्तकारी परिर्वतन प्रकृयाय् दुगु व थुकी माओवादी प्रतिबद्धताय् आशंकाय् मयायेत इनाप यानादिल ।
