खुल्लामञ्चय् माओवादी जनसभाय् सुनां छु धाल ?

प्रमुख प्रतिपक्षी दल एनेकपा (माओवादीं) मजदुर दिवसया लसताय् येँय् विशाल जनसभा यानाच्वंगु दु । सभाय् माओवादीं न्यागू लखं अप्व मनूतय् ब्वति दुगु दावी याःगु दु । खुल्लामञ्च छगूलि मनूत जाःया नं अन नाप नाप नं द्वलंद्व मनूत च्वना जनसभाय् ब्वति कयाच्वंगु दु ।

सभाय् माओवादी अध्यक्ष पुष्पकमल दाहाल 'प्रचण्ड' सहित केन्द्रीय दुजःतय् ब्वति दु । सभायात माओवादी अध्यक्ष प्रचण्ड लगायत केन्द्रीय नेतातय्सं सम्बोधन यानादीगु खसा: सभाय् थीथी कलाकारतय्सं सांस्कृतिक ज्याझ्वः नं यानाच्वंगु दु ।

माओवादीं स्वनिगःया थीथी झिंप्यागू थासय् मुनाः पोलिटब्यूरो दुजःतय् नेतृत्वय् जुलुस पिकाःगु खः । स्वनिगःया कलंकी, गंगबु, बालाजु, महाराजगंज, चावलही, कोटेश्वर, सातदोवाटो, केशरमहल, पद्मोदयमोड, कालीमाटी, बागबजाः, सुन्धारा, बानेश्वर, कुपण्डोल व पुल्चोकं पिहांवःगु जुलुस खुल्लामञ्च थ्यंकाः सभाय् हिउगु खः ।

खुल्लामञ्चय् ब्वति कायेत वःपिं माओवादी कार्यकर्तातय्त माओवादी अध्यक्ष प्रचण्ड, वरिष्ठ उपाध्यक्ष मोहन वैद्य, मेम्ह उपाध्यक्ष डा. बाबुराम भट्टराई, महसचिव राम बहादुर थापा 'बादलं' रत्नपार्कय् च्वंगु विद्युत प्राधिकरणया ज्याकू च्वये च्वनाः अभिवादन याःगु खः ।

जनसभाय् सुनां छु धाल ?

प्रचण्ड पाखें सम्बोधन -

- नेपाःया इतिसाहय् आः तकं थुलीया ल्याख्य् जनसमुदायया जनसभा मजूनी ।
- थुली शान्तिपूर्ण, अनुशासित, व्यवस्थित आन्दोलन आः तक नेपालय् गबलें मजुनी ।
- थुली ल्याख्य् मनूतय् जनसागर स्वयेगु खःसा थ्व मोर्चा माओवादीं बच्छि स्वयां अप्व त्याकेधुंकूगु दु ।
- प्रतिक्रियावादी, प्रतिक्रान्तिकारी, अवसरवादीया निंतिं छगू हाथ्या जुयाब्यूगु दु ।
- जनसागरया त्याग, तपस्या व पहल कदमीया कारणं दक्वं खँ प्रस्ट जुइधुंकूगुलिं जिं यक्व न्ववायेमा थें मच्वं ।
- जनसागर थन हिंसा ब्वलंकेत मजुसें कुर्सीया निंतिं विदेशीया नांमय् चाकडी व देय्यातगद्दारीला यानाच्वंगु मदुला धकाः खबरदारी यायेत वःगु ख: ।
- नेपाःया स्वाधिनता व नेपाली जनतया आत्मनिर्णयया अधिकार सुनिश्चित यायेत नेपाःपिं थन वःगु ख: ।
- संघीयता, गणतन्त्र व संविधानसभा गरीबतय् झुपडीं जन्म जूगु ।
- नेपाःया दक्वं राष्ट्रवादी शक्तियात नेपाली जनतया आदेश कथं राष्ट्रया निंतिं छप्पँ जुइत इनाप ।
- आन्दोलन दकलय् अप्व संवैधानिक व नैतिक जुइगु खँ विश्व व नेपाःया इतिहासं क्यनेधुंकूगु दु ।
- प्रधानमन्त्री थिम्पुं लिहांवयेधुंकाः सरकारया भाय् पात । थिम्पुं सुयाः आदेश न्यनाः थंज्याःगु भाय् न्ववाःगु खँ जनता थुइकेधुंकल ।
- आम हड्ताल झीगु रहर मजुसें नेपाली जनताया सम्वृद्धिया निंतिं, शान्तिया निंतिं व संविधानया निंतिं आवश्यकता खः ।
- संसदया फोहरी कासां वःगु परिवर्तन मखु थ्व द्वलंद्व नेपाली जनताया काय् म्ह्याय्या बलिदानं वःगु परिवर्तन जूगुलिं आः सतकय् दुगु दक्वं माग पूमवंतल्ले थ्व आन्दोलन दीमखु ।
- विदेशी प्रभुया न्ह्यने क्वछुइगु ई फुइधुंकूगु व आः थःपिं सुंनाप क्वछुइमखु ।
- झी भारत, चीन नापं दक्वं नाप समानताया स्वापू कायम यायेत चाहे जूगु दु । नेपाःया भूमीया अतिक्रमण जुयाच्वंगु स्वये चाहे मजू ।
- भारतीय नेतातय्सं आः माधव नेपालया सरकारं दक्वं ठीक याइ व नेपाली सेनायात ल्हातेय् कयाः माओवादीयात सीधेयेकीगु बिचाः यानाच्वंगु दसा: आः अज्या:गु सम्भव मजूगुलिं भारतीय नेतातय् अज्याःगु बिचाः मययोत इनाप ।
गिरिजाबाबुं उच्चस्तरीय राजनीतिक संयन्त्र प्रचण्डया नांमय् दयेकाः ब्यूगु । गिरिजाबाबुया विश्वास पात्रं माओवादीय सिधयेकेगु षड्यन्त्र जुयाच्वंगुलिं संयन्त्र दयेकेमाःगु खँ धाःगु खँ प्रचण्डं कनादिल ।
- जनता सतकय् कुंहावयेधुंकाः विश्वया छुं तनाशहां नं पनेफइमखु ।
- आः तक येँया जनसमुदाययात राज्य सत्तां क्वतेला तःगु दु । उकीं नेवाः जनसमुदायात मुक्ति बीगु आन्दोलन थ्वहे खः । स्वनिगःया जनसमुदाया उकी नं विशेष यानाः नेवाःतय्त आन्दोलनय् कुहांवयेत इनाप ।
- दलत दथुइ जुयाच्वंगु बैठकय् सहमतिया निंतिं उद्योग व्यवसायीतय्सं यक्व कुत: यानाच्वंगु धयादिसें माओवादी आन्दोलनय् भचा धैर्यता तयेत इनाप ।
- पत्रकारतय्त नं राष्ट्रया निंतिं थ्व अभियानय् साथ बीत अपील ।
- अन्तर्राष्ट्रिय समुदाययात नेपाः छगू युगान्तकारी परिर्वतन प्रकृयाय् दुगु व थुकी माओवादी प्रतिबद्धताय् आशंकाय् मयायेत इनाप ।
- थौं थें हे शान्तिपूर्ण आन्दोलन यायेत सकलसित इनाप यानादिसें दक्वसितं छप्पँ जुयाः कन्हय् नं आन्दोलन यायेत इनाप ।

वाईसीएलया अध्यक्ष गणेशमान पुनं थःपिंसं सेनाया जनरेलत नाप सहलह यानाःगु धयादिसें उमिसं थःपिंत आन्दोलनया निंतिं भिंतुना ब्यूगु धयादिल । वय्कलं वाईसीएल व सेना परिचालन यायेत सरकारयात हाथ्याय् बियादिसें आः सेना सतकय् कुहांवसाः सेनाया ल्वाभः प्रतिभामी पाखे स्वइगु दाबी यानादिल ।

सभायात सम्बोधन यानादिसें पोलिटब्यूरो दुज: अग्नि सापकोटां थौंया आन्दोलन न्हापा लिपाया अन्दोलन स्वयां पाःगु धयादिसें माधव नेपालं दमन यायेत स्वःसा ज्ञानेन्द्रया स्वयां बाम्लागु स्थिति वइगु ख्याच्वः बियादिल । वय्कलं सरकारं भिजिलान्ते छ्यलाः आन्दोलनया बदनाम यायेत स्वःगु द्वपं बियादिल ।

अखिल नेपाल मजदुर संघया अध्यक्ष शालिकराम जम्मकट्टेलं माओवादीं सत्ता कब्जा यायेत स्वःगु धकाः सरकारं हल्ला ब्वलंकूगु धयादिसें थःपिनिगु आन्दोलन शान्ति व संविधानया निंतिं शान्तिपूर्ण आन्दोलन जूगु धयादिल । वय्कलं इतिहासयात ल्यूने घ्वनछ्वयेत स्वयाच्वंपिं व विदेशी दलालत नाप ल्वायेत माओवादीं आन्दोलन यानाच्वंगु धयादिल ।

अखिल क्रान्तिकारीया अध्यक्ष लेखनाथ न्यौपनें माओवादीं जनता पाखे स्वयाः न्हूगु सुथया नेतृत्व यायेगु उदघोष याःगुलिं द्वलंद्व विद्याथी, मजदुर, किसानतय्सं आन्दोलनय् ब्वति काःगु धयादिल । वय्कलं थ्व जनतायात स्वतन्त्र याइगु अन्तिम लडाईं जूगु धयादिसे विद्यार्थी व ल्याम्हतय्त आन्दोलनय् ब्वति कायेत इनाप यानादिल ।

अथेहे न्यौपानें थःपिं जा नयाः आन्दोलनय् वयेगु, जा सिधसाः बजी, बजी नं सिधसाः ल जक त्वनाः वयेगु व ल नं सिधसाः छुं हे मनसें जुसां आन्दोलनय् वयेगु धयादिल । वय्कलं आ: आन्दोलन सफल मजुइकं जनता लिहांमवनीगु धयादिल ।

अखिल नेपाल महिला संघ (क्रान्तिकारी)या अध्यक्ष जयपुरी घर्ती मगरं माओवादी आन्दोलनयात नेपाली मिसातय् पाखें समर्थन दुगु धयादिल । नपां वय्कलं नेपाःया दक्वं मिसात विषेश यानाः येँया मिसातय्त आन्दोलनय् ब्वति कायेत इनाप यानादिल ।

वय्कलं माओवादी शान्तिपूर्ण आन्दोलनया खँल्हानाच्वंगु इलय् सरकारं हिंसाया खँल्हानाच्वंगु धयादिसें यदि सरकारं ल्वाभः ल्ह्वनीसाः नेपाली मिसातय्सं छाय् ल्वाभः ल्ह्वने मदुगु धका: न्ह्यस: तयादिल । वय्कलं नेपाली जनतां यक्व दुःख सीधुंकूगुलिं आः अन्तिम लडाईंया निंतिं न्यय्द्वं नेपाली मिसातय्सं बलिदान बीत तयार जूगु धयादिल ।

नेपाल दलित मुक्ति मोर्चाया अध्यक्ष तिलक परियारं दलिततय् मुक्तिया निंतिं माओवादी नेतृत्वया सरकार अवश्यक जूगु धयादिल । दलितय्त राज्यं खिचा व भौचा स्वयां क्वये त्येगु ज्या याःगुलिं उत्पीडनय् लाःपिं दलितय्सं थुगु आन्दोलनय् सक्रियता क्यनेमाःगु धयादिल ।

मधेसी राष्ट्रिय मुक्ति मोर्चा (क्रान्तिकारी)या महासचिव रामरिझन यादवं मेमेगू मधेसी दलतय्सं मधेसी जनसमुदायया सेवा यायेमफइगु दाबी यानदिसें नेपाली मधेसीतय्त माओवादीं जक मुक्ति बीफइगु दाबी यानादिल ।