माओवादी जनसभाया निंतिं स्वंगू दलया बैठक स्थगित
राजनीतिक गतिरोध ज्यंकेगु निंतिं च्वंगु स्वगू दलीय कार्यदलया बैठक माओवादी जनसभाया निंतिं स्थगित याःगु दु । माओवादी जनसभा लिपा हानं थौं हे स्वताः इलय् स्वंगू दलीय कार्यदलया बैठक च्वनीगु जूगु दु ।
शनिवाः सुथय् च्वंगु कार्यदलया बैठकय् झिंनिगू बुँदे सम्झदारी निसें पुलांगु सम्झौता व सहमतिया समिक्षा व कार्यन्वयन, विश्वासया वातावरण निर्माण यायेगु, राष्ट्रपतिं ल्ह्वंगु पलाः नापं शान्ति प्रकृयाया बारे सहलह जूगु खः ।
बैठक लिपा माओवादी उपाध्यक्ष डा. बाबुराम भट्टराईं सहलहलया एजेण्डाया कथं दुगु खुगु बुँदा मध्ये प्यंगू बुँदाय् सहलह सिधःगु कनादिल । वय्कलं आः सत्ता साझेदारी व संविधान निर्माणया बारे जक सहलह याये ल्यँदनीगु कनादिल ।
अथेहे वय्कलं बैठक सकारात्मक जूगु धयादिसें थौं सनिलय् तक सहमति जुसाः कन्हय् निसेंया आन्दोलनया ज्याझ्वः लितकायेगु धयादिल । नापं वय्कलं सहमतिया निंतिं कुतः जुयाच्वंगु इलय् नीनिगू दलं माओवादीया प्रतिकार यायेगु धकाः वःगु निर्णय दुर्भाग्यपूर्ण जूगु कनादिल ।
बैठकय् माओवादी पाखें भट्टराई नापं वर्षमान पुन 'अनन्त', कांग्रेस महामन्त्री विमलेन्द्र निधि, डा. रामशरण महत व कृष्ण प्रसाद सिटौला व एमाले पाखें महाचिव ईश्वर पोखरेल व प्रदीप ज्ञवालीया ब्वति दुगु खः ।
