सतकं सरकार परिवर्तन लोकतन्त्रया उपहास : नीनिगू दल
प्रधानमन्त्रीं खुता: इलय् राष्ट्रया नांमय् सम्बोधन
सरकारयात समर्थन याइगु नीनिगू दलं माओवादीं धाःगु कथं सतकं सरकार परिवर्तन यायेगु लोकतन्त्रया उपहास जूगु ठहर या:गु दु । उमिसं थंज्याःगु गतिविधि लोकतान्त्रिक प्रणाली व अभ्यास विपरीत धासें जोरजबर्जस्तीया न्ह्यने क्वमछुइत सरकारयात इनाप याःगु दु ।
शनिवाः सुथय् प्रधानमन्त्री निवास बालुवाटारय् च्वंगु बैठकय् माओवादीं घोषणा याःगु आन्दोलनं ब्वलनीगु परिस्थिति लगायत विषयलय् सहलह यासें प्यंगू बुँदे प्रस्ताव पारित याःगु दु । बैठकं माओवादी लडाकु समायोजन व पुनःस्थापना, संविधान निमार्ण यायेगु खँय् प्रतिबद्धता, वाइसीएलया अर्धसैन्य संरचना विघटन व कब्जा यानातःगु छेँबुँ लितबीया माओवादी नागरिक राजनीतिक दलय् परिणत जुसाः सहमति निर्माण यायेगु लँपु चालीगु खँ धाःगु दु ।
अथेहे बैठकय् थीथी दलया नेतातय्सं प्रधानमन्त्री नेपालं राष्ट्रया निंतिं सम्बोधन यायेत सुझाव ब्यूगु खः । बैठक लिपा नेकपा (माले)या महासचिव सीपि मैनालीं थौं हे प्रधानमन्त्रीं राष्ट्रया नांमय् सम्बोधन यानादीगु कनादिल । प्रधानमन्त्रीं थौं सनिलय् खुता: इलय् राष्ट्रया नांमय् सम्बोधन यानादीगु जूगु दु ।
बैठकय् नेपाली कांग्रेसया कार्यवाहक सभापति सुशील कोइराला, वरिष्ठ नेता शेरबहादुर देउवा, कांग्रेस संसदीय दलया नेता रामचन्द्र पौडेल, नेकपा (एमाले)या महासचिव ईश्वर पोखरेल, मधेसी जनअधिकार फोरम (लोकतान्त्रिक)या अध्यक्ष विजयकुमार गच्छदार, तराई–मधेस लोकतान्त्रिक पार्टीया अध्यक्ष महन्थ ठाकुर, सद्भावना पार्टीया अध्यक्ष राजेन्द्र महतो, नेकपा (माले)या महासचिव सीपी मैनाली लगायत नीनिगुलिं दलया शीर्ष नेतातय् उपस्थिति दुगु ख: ।
