'अनमिनया म्याद तनेगु बारे याकनं निर्णय यानादिसं'

नेपाः स्थिति राष्ट्रसंघीय मिसन अनमिनया प्रमुख करिन ल्यानग्रेनं नेपालय् अनमिनया म्याद तनेगु खःसा याकनं निर्णय कायेत प्रधानमन्त्रीयात इनाप यानादीगु दु ।

नेपाः सम्बन्धी प्रतिवेदनय् सहलह यायेत आइतवाः राष्ट्रसंघीय मुख्यालय न्युयोर्क प्रस्थान याये न्ह्यः शनिवाः प्रधानमन्त्री नेपालयात नापलाना ल्यानग्रेनं अनमिनया बारे याकनं निर्णय यायेत इनाप यानादीगु खः । उगु इलय् प्रधानमन्त्री नेपालं म्याद थप यायेगु मयायेगु बारे मेमेगू दलत नाप सहलह जुयाच्वंगु व सरकारं उकीया बारे याकनं हे निर्णय याइगु धयादिल ।

प्रधानमन्त्री निवास बालुवाटारय् जूगु खँल्हाबंलाय् नेपाःया शान्ति प्रकृया गम्भीर मोडय् थ्यंगु बारे नं सहलह जूगु खः ।