मे दिवसय् नं सहमतिया निंतिं स्वंगू दलं सहलह याइगु
थौंया बैठक निष्कर्षबिहीन
राजनीतिक सहमतिया निकास मालेत च्वंगु स्वंगू प्रमुख दलया बैठक शुक्रवाः बिना निष्कर्ष क्वचाःगु दु । तर बैठक सकारात्मक जूगु व सहलह यायेत थप ई माःगुलिं कन्हय् मे दिवसया न्हि कुन्हु नं सहलह यायेगु निर्णय स्वंगू दलया नेतातय्सं याःगु दु ।
शुक्रवाः सुथय् स्वंगू तःधंगु दलत दथुइ छुं सहमति मजुइवं हानं सनिलय् च्वंगु बैठकय् नेतातय्सं दक्वं समस्याया समाधान प्याकेजय् हे यायेगु बारे सहलह याःगु खः । संविधान निर्माण, सेना समायोजन, राष्ट्रिय सहमतिया सरकारया बारे प्याकेजय् हे सहमति यायेगु बारे नेतात दथुइ सहलह जूगु व उकी कांग्रेस नं सहमत जूगु खँ एमाले अध्यक्ष झलनाथ खनालं कनादिल ।
अथेहे शीर्ष नेततातय् बैठक लिपा खनालं थौंया बैठक सकारात्मक जूगु धयादिसें ई अभावया कारणं कन्हय् न्हिच्छि च्वनाः सहमतिया निंतिं कुतः यायेगु धयादिल । वय्कलं जेठ १३ गते जूगु खुगू बुँदा नापं मेमेगू विषययात दुथ्याका कन्हय् प्याकेजय् सहमति यायेगु कथं थौंया बैठक क्वचाःगु कनादिल ।
कांग्रेस संसदीय दलया नेता रामचन्द्र पौडेलं स्वंगू दलया नेतात दथुइ देय्यात मुठभेडया राजनीतिक पाखे यंकेमज्यूगु खँय् छगू हत दुगु कनादिल । वय्कलं नं सहमतिया निंतिं थप ई माःगुलिं शनिवाः सुथंनिसें च्वना सहलह यायेगु कनादिल ।
येँया लजिम्पाटय् दुगु होटल र्याडिसनय् जूगु बैठकय् माओवादी अध्यक्ष पुष्पकमल दाहाल 'प्रचण्ड', वरिष्ठ उपाध्यक्ष मोहन वैद्य, मेम्ह उपाध्यक्ष डा. बाबुराम भट्टराई, कांग्रेस संसदीय दलया नेता रामचन्द्र पौडेल, महामन्त्री विमलेन्द्र निधि, केन्द्रीय दुजः कृष्णप्रसाद सिटौलाया ब्वति दुगु खःसा एमाले पाखें अध्यक्ष झलनाथ खनाल, महासचिव ईश्वर पोखरेल, स्थायी समिति दुजः भरतमोहन अधिकारी लगायत नेतातय् ब्वति दुगु खः ।
