'सेना परिचालन याइपिं म्युजियमया पात्र जुइ'
एकीकृत नेकपा (माओवादी)या युवा संगठन वाइसिएलया अध्यक्ष गणेशमान पुनं माओवादी आन्दोलन विरुद्ध सेना परिचान याइपिं म्युजियमया पात्र जुइगु दाबी यानादीगु दु ।
रिपोटर्स क्लबं शुक्रवाः येँय् याःगु साक्षात्कार ज्याझ्वलय् वय्कलं माओवादी आन्दोलन विरुद्ध सेना परिचालन जुसाः सेना दुने हे विद्रोह जुइगु ख्याच्वः बियादिल । वय्कलं थःपिंसं सेनाया जर्नेलत नाप सहलह याये धुनाःगु धयादिसें सेना परिचालन जुसाः राष्ट्रवदी सेना विद्रोह यायेत तयार दुगु धयादिल ।
ज्याझ्वलय् तरुण दलया अध्यक्ष नापं सभासद् महेन्द्र यादवं सतकं हे सरकार परिवर्तन यायेगु खःसा कन्हय् प्रचण्ड नेतृत्वया सरकार वःसा थःपिंसं नं सतकं हे सरकर परिवर्तन यायेगु ख्याच्वः बियादिल । आः तक छगू जक दलं याःगु आन्दोलन गनं नं सफल मजूगु धयादिसें यादवं माओवादीं जनता क्वकाये मफुगुलिं हे पेट्रोल बमया सहारा काःगु धयादिल ।
अथेहे युथ फोर्सया अध्यक्ष महेश बस्नेतं माओवादी आन्दोलन जनआन्दोलन मजूगु धयादिसें सत्ता कब्जा यायेगु चाल जूगु द्वपं बियादिल । वय्कलं माओवादीया सत्ता कब्जा यायेगु रणनीति विरुद्ध सेनायात सतर्क तयेगु सरकारी निर्णयया लुसकुस यानादिल ।
