चन्दा आतंकया कारणं येँया पसः बन्द
स्वेच्छिक रुपं जक चन्दा बीत माइकिङ
एकीकृत नेकपा (माओवादीं) मजदुर दिवस व वयां कन्हय् कुन्हु निसें यायेत्यंगु अनिश्चिताकालीन आमहड्तालया निंतिं ग्वाहालि धासें चन्दा फ्वनेवं येँया व्यापारित आतंकित जुयाः शुक्रवाः थःपिनिगु पसः बन्द याःगु दु ।
चन्दा आतंकया कारणं येँया न्हू सतकय् च्वंगु अधिकांश प्रमुख व्यापारिक केन्द्रत बन्द जूगु दु । सुन्धाराय् च्वंगु काठमाडौं मल, न्हू सतकय् च्वंगु बिशालबजाः, आर बी कम्प्लेक्स, पिपुल्स प्लाजा, पशुपति प्लाजा, सुरज आर्किड बन्द जूगु दुसाः येँ दुनेया असं, मखं, बागबजाः, महाबौद्ध आदि थीथी थाय्या पसः नं बन्द जूगु दु ।
माओवादी कार्यकर्तातय्सं थःपिनिगु आन्दोलनया निंतिं ग्वाहालि यायेत धासें झिद्वं निसें छगू लख तक चन्दा फ्वंगु खँ व्यापारीतय्सं धाःगु दु । उखे माओवादीं धाःसा थःपिंसं स्वेच्छिक चन्दा जक कयाःगु खँ धाःगु दु । चन्दा आतंक जुयाः थीथी थाय्या पसः बन्द जुइवं माओवादी कार्यकर्तातय्सं न्हू सतक क्षेत्रय् स्वेच्छिक रुपं जक चन्दा बीत इनाप यासें माइकिङ याःगु दु । नेवा: भासं व खँय् भासं माइकिङ यासें माओवादी कार्यकर्तातय्सं यदि सुना नं जवरजस्ती याःसा माओवादी ज्याकूथी जानकारी बीत इनाप याःगु दु ।
