प्रमया राजीनामां जक आन्दोलन दीमखु
एकीकृत नेकपा (माओवादीं) प्रधानमन्त्री माधवकुमार नेपालं राजीनामा बीवं जक थःपिंसं आन्दोलन लितमकायेगु निर्णय याःगु दु । शुक्रवाः सुथय् माओवादी पदाधिकारीतय् बैठकं शान्ति प्रकृया पूवंकेत व संविधान निर्माण यायेगु निंतिं माओवादी नेतृत्वया राष्ट्रिय सहमतिया सरकार निर्माण मजूतल्ले प्रमं राजीनमा बीवं जक आन्दोलन लितमकायेगु क्वःछिउगु खः ।
बैठक लिपा माओवादी सचिव सीपि गजुरेलं माओवादी नेतृत्वय् राष्ट्रिय सहमतिया सरकार निर्माण मजुइकं आन्दोलन लितमकायेगु कनादिल । नापं वय्कलं माओवादीपाखें अध्यक्ष प्रचण्ड हे प्रधानमन्त्री जुइगु कनादिल ।
अथेहे माओवादीं थःपिनिगु आन्दोलनया निंतिं दक्वं तयारी पूवंगु खँ धाःगु दु । छुं न्हि न्ह्यः निसें माओवादीं आन्दोलनया निंतिं आपालं मनूत थीथी जिल्लां येँ हःगु खः । माओवादीया युवा संगठन वाईसिएलं जक छगूत्याः लख वाईसिएल कार्यकर्ता येँ वःगु दाबी या:गु दु । वाईसिएलया कार्यकर्तातय्सं शुक्रवाः सुथय् नं येँया थीथी थासय् मार्चपास व मोटर साइकल र्याली याःगु दु ।
