माओवादीं हिंसाया माध्यमं सत्ता कब्जा यायेत स्वयाच्वन : प्रम
प्रधानमन्त्री माधवकुमार नेपालं एनेकपा (माओवादीं) हिंसात्मक तरिकां सत्ता कब्जा यायेत स्वयाच्वंगु खँ धयादीगु दु । वयक्लं माओवादीं हिंसाया माध्यमं सत्ता कब्जा यायेत स्वःसा देशय् न्ह्यागु नं जुइफइगु ख्याच्वः बियादिल ।
दक्षिण एसियालि क्षेत्रीय सहयोग संगठन (सार्क) या झिंखुक्वःगु शिखर सम्मेलय् ब्वति कयाः येँय् लिहांवयेवं शुक्रवा: अन्तर्राष्ट्रिय त्रिभुवन विमानस्थलय् पत्रकरत नाप खँल्हाबंला यानादिसें वय्कलं माओवादी कार्यकर्तातय्सं आन्दोलनया निंतिं हःगु विस्फोटक पदार्थ, खुकुरी लगायत ल्वाभः थीथी थासय् लूगुलिं आन्दोलन हिंसात्मक जुइगु स्पष्ट रुपं खनेदुगु धयादिल ।
वय्कलं थः समस्याया बाधक मजूसें ग्वाहालिमि जूगु तर वार्ता पाखें हे समस्याया समाधान मालेत माओवादी इमान्दार मजूगु द्वपं बियादिल । आःया प्रमुख आवश्यकता न्हूगु संविधान व शान्ति प्रकृयायात निष्कर्षय् थ्यंकेगु जूगु थुइकाः माओवादी आन्दोलन त्वःता वयेमाःगु धयादिल ।
प्रधानमन्त्री नेपालं झिंखुक्वःगु शिखर सम्मेलन तसकं सफल जूगु धयादिल । वय्क नेपाःया नीप्यम्ह प्रतिनिधिमण्डलया नेतृत्व यानाः सम्मेलनय् ब्वति कायेत मंगलवाः थिम्पु प्रस्थान यानादीगु खः ।
