माओवादी आन्दोलन बारे ल्यानग्रेनया च्यूताः
नेपाः स्थित संयुक्त राष्ट्रसंघीय मिसन अनमिनया प्रमुख करिन ल्यानग्रेनं माओवादीं यायेत्यंगु आम हड्तालया बारे च्यूताः प्वंकादीगु दु ।
ल्यानग्रेनं शुक्रवाः माओवादी अध्यक्ष पुष्पकमल दाहाल 'प्रचण्ड' व एमाले अध्यक्ष झलनाथ खनाल नाप नापलाना थंज्याःगु च्यूताः प्वंकादीगु ख: । वय्कलं निम्ह नेतात नाप बिस्कं बिस्कं नापलना माओवादीया आन्दोलन, शान्ति प्रकृया व संविधन निर्माणया बारे सहलह यानादीगु खः ।
न्हू बजारय् च्वंगु प्रचण्ड निवासय् वनाः ल्यानग्रेनं माओवादीया आन्दोलन हिंसात्मक जुइगु धकाः बुखँत वयाच्वंगुलिं आन्दोलनयात शान्तिपूर्वक व हिंसारहित दयेकेत इनाप यनादिल । नापं वय्कलं संविधान निर्माण व शान्ति प्रकृया न्ह्यनाःतुं च्वंगुलिं माओवादीयात संवाद व सहमति यानाः न्ह्याः वनेत इनाप यानादिल ।
अथेहे एमाले अध्यक्ष खनाल नाप वय्कलं माओवादी आन्दोलन न्ह्यः हे सहमति यानाः शान्ति प्रकृया व संविधान निर्माणय् केन्द्रीत जुइत इनाप यानादिल ।
