राजधानीइ माओवादीया मार्चपास

येँ (सन्ध्या टाइम्स)/माओवादीया भ्रातृ संगठन वाईसीएलया द्वलंद्वः कार्यकर्तातय्सं थौं सुथय् येँया थीथी थासय् मार्च पास याःगु दु। मार्चपास याःगुलिं सुथंनिसें हे थाय्थासय् यातायात संचालनय् पंगः ब्वलंगु खः ।

वाईसीएल कार्यकर्तातय्सं सरकार विरोधी नारा थ्वयेकाः स्वक्वःगु जनआन्दोलन सफल याये नु धासें उगु मार्च पास याःगु खः। उगु मार्चपास रत्नपार्क, लैनचौर, पुतलीसडक, बागबजाः नापं थाय्थासय् चाःहिउगु खः ।

अथे हे इमिसं लैनचौरंनिसें छगू मोटरसाइकल र्‍याली नं पिकाःगु दु। उगु र्‍याली शान्तिबाटीकाय् थ्यंकाः कोणसभा यानाः क्वचायेकूगु खः। लिसें सरसफाई अभियान नं न्ह्याकूगु दु। येँया भोताहिति, पुतलिसडक, यलया मंगलबजाः नापं थाय्थासय् वाईसीएल कार्यकर्ता परिचालन यानाः सरसफाई अभियान न्ह्याकूगु खः ।

कंस १८ गते मजदूर दिवस व १९ गतेनिसें माओवादीं याइगु आम हडताल ताःलाकेत स्वनिगलं पिनें थन वयाच्वंपिं द्वलंद्वःम्ह वाईसीएल कार्यकर्तायात परिचालन यानाः थौं सफाई अभियान न्ह्याकूगु खः। च्वाफि, साबिल नापं सरसफाई यायेत माःगु सामान ज्वनाः छगू हे थासय् सलंसःम्ह मनूत झ्वःछुनाः अथे अभियान न्ह्याकूगु खः। सफाई अभियान नापनापं थाय्थासय् कोणसभा नं यानाः १८ गतेया मजदूर दिवस तःजिक क्वचायेकेत नापं १९ गतेनिसेंया आमहडतालया थःथःगु थासं ग्वाहालि यायेत इनाप यासें आह्वान नं यानावंगु खः ।

स्वनिगलय् जक हे माओवादीया वाइसीएल कार्यकर्तात स्वनिगलं पिने तालिम बियाः थ्यंमथ्यं न्याद्वःम्ह सिबें अप्वः हयेधुंकूगु दुसा थौं व कन्हय् नं पिनें वइपिनिगु क्रम जारी हे जुयाच्वनी धकाः वाईसीएलं धाःगु दु। इमित येँया थाय्थासय् नापं स्वनिगःया थीथी गुँया क्वय् सार्वजनिक थाय्, स्कूल, कलेज, न्हूगु चायेकूगु हाउजिंग नापं पार्टी प्यालेसय् नं तयातःगु दु। कन्हय् तकया दुने छगू लाखसिबें अप्वः कार्यकर्तात येँय् थ्यनीगु खँ माओवादीं धाःगु दु ।