सार्क सम्मेलन थौं क्वचाइगु

येँ (सन्ध्या टाइम्स)/'हरियाली व खुशीयाली दक्षिण एसिया' धइगु नारा बियाः भुटानया थिम्पुइ म्हिगःनिसें शुरु जूगु दक्षिण एसियाली क्षेत्रीय सहयोग संगठन सार्कया झिंखुक्वःगु शिखर सम्मेलन थौं क्वचाइगु जूगु दु। झिंन्हय्क्वःगु सार्क सम्मेलन मालदिभ्सया राजधानी मालेय् यायेगु प्रस्ताव तःगु दु। थौं थिम्पु घोषणापत्र जारी यासें सम्मेलन क्वचायेकीगु ज्याझ्वः दुसा उगु सम्मेलनय् ब्वति कयादीम्ह नेपाःया प्रधानमन्त्री माधव नेपाल कन्हय् येँय् लिहां झाइगु खँ दु ।