नेविसंघया नेता दुर्घटनाय् लानाः मंत

येँ (सन्ध्या टाइम्स)/नेपाली कांग्रेसया भ्रातृ संगठन नेपाल विद्यार्थी संघया पुलांम्ह महामन्त्री बासु कोइराला मोटरसाइकल दुर्घटनाय् लानाः मंत। सुनसरी इनरुवा ७ य् छेँ दुम्ह ३८ दँया कोइराला थम्हं हे चले यानावंगु को. ३ प २७८३ नम्बरया मोटरसाइकल पूर्वपश्चिम राजमार्ग अन्तर्गत सुनसरीया भाक्राहा धइगु थासय् दिकातःगु ट्रकय् न्यानाः दुर्घटना जूगु खः। उकी लानाः कोइराला घटनास्थलय् हे मदुगु खः। कांग्रेसं थौं वय्कः मदुया शोक मने याइगु जूगु दु ।