आः ला मेलम्ची वइगु खः ला?
येँ (सन्ध्या टाइम्स)/स्वनिगःया जनतायात वालछ्याल जुइक लः त्वंकेगु लागिं धकाः वंगु २५ दँ न्ह्यवंनिसें चर्चाय् वयाच्वंगु मेलम्चीया लः आः धाथें वइगु खः लाकि धइगु चीधंगु आशा ब्वलंगु दु यद्यपि मेलम्ची वहे वइगु जुल धकाः ढुक्क जुयाः धायेफुगु अवस्था धाःसा अझ नं मवःनि ।
मेलम्ची परियोजनाया दकलय् थाकुगु पक्ष जुयाच्वंगु सुरुङ्ग म्हुइगु ज्या थौंकन्हय् बांलाक हे न्ह्यानाच्वंगु कारणं थ्व आशा पिहां वःगु खः। मेलम्चीया लः येँय् हयेगु लागिं मुक्कं २६.५ किलोमिटर सुरुङ्ग म्हुइमाः। आः तकया दुने ६ मिटर सुरुङ्ग म्हुइ धुंकूगु दु। थ्व सुरुङ्ग म्हुइगु ज्या थौंकन्हय् न्हिं २ मिटरया ल्याखं म्हुइगु ज्या जुयाच्वंगु दु ।
मेलम्ची परियोजना ज्याकुथिं धाः कथं आः थ्व परियोजनाय् थ्वहे सुरुङ्ग म्हुइगु ज्या हे छगू जक ल्यं दनि। सुरुङ्ग क्वचाल कि हे लः हयेगु ज्या शुरु जुइ ।
सुरुङ्ग म्हुइगु थ्व ज्या चिनियाँ कम्पनीपाखें जुयाच्वंगु दु। यदि दथुइ गनं नं अवरोध मवल धाःसा सन् २०१३ या सेप्टेम्बरय् थ्व ज्या क्वचायेगु खँ चिनियाँ कम्पनीं धाःगु दु। तर सुरुङ्ग म्हुइगु ज्याय् अवरोध धाःसा आः हे पिहां वयेधुंकुगु दु। थ्व सुरुङ्ग म्हुइगु ज्या मेलम्चींनिसें येँ तकया थीथी च्यागू थासय् छक्वलं म्हुइगु योजना दुगु खः। तर थौंकन्हय् येँया सुन्दरीजल लागाय् जक म्हुयाच्वंगु दु। बाँकी न्हय्गू थासय् स्थानीय जनताया अवरोधं यानाः ज्या न्ह्याके फयाच्वंगु मदुनि। अथे खःसां चिनियाँ कम्पनीं ज्या धाःसा दिकूगु मदुनि। उपिं आः छुं न्हि लिपा हे सुन्दरीजल लागाय् थःपिनि क्याम्प हे दयेकाः च्वं वयेत्यंगु दु ।
मेलम्ची परियोजना मुक्कं २० अर्ब तकाया परियोजना खः। थुकी सुरुङ्ग जक म्हुइत ५ अर्ब तकाया छुटे याना तःगु दु।
मेलम्चीपाखें येँय् न्हिं १७ करोड लिटर लः हयेगु योजना दु। तर थ्व परियोजना सिधइगु इलय् तक येँया जनसंख्या अप्वयाः न्हापा बिचाः याः थें लः मवयेफुगु खँ विज्ञतय्सं धाःगु दु। येँय् थौंकन्हय् हे न्हिं ३० करोड लिटरया माग दु। उकी सरकारं २० करोड लिटर जक बी फयाच्वंगु दु। मेगु निदँ प्यदँया दुने थ्व माग अझ अप्वयाः मेलम्चीया लखं नं फये मफइगु अवस्था वयेफुगु खँ धाःगु दु ।
