निगू घोषणा यासें झिंखुक्वः सार्क क्वचाल
दक्षिण एसियाली क्षेत्रीय सहयोग संगठन (सार्क)या झिंखुक्वःगु शिखर सम्मेलन 'थिम्पु रजत जयन्ती घोषणापत्र' व 'जलवायु परिवर्त सम्बन्धी थिम्पू वक्तव्य' जारी यासें बिहिवा: क्वचाःगु दु ।
सार्क स्थापना जूगु नीन्यादँय् न्हापांगु खुसीइ भुटानय् जूगु सम्मेलनय् सार्कया च्यागूलिं देय्या राष्ट्र व सरकार प्रमुखतय्सं थिम्पु रजत महोत्सव घोषणापत्र व जलवायु परिवर्तन सम्बन्धी थिम्पु वक्तव्य जारी याःगु खः । शिखर सम्मेलनय् नेपालं ल्ह्वंगु जलवायु परिवर्तन मुद्दायात कया: विशेष व्यक्तव्य जारी जूगु खः ।
स्वीन्हय्गू बुँदे रजत जयन्ती घोषाणपत्रय् २०१० निसें २०२० यात 'अन्तरक्षेत्रीय सम्पर्क दशक' कथं हनेगु खँ न्ह्यथंनातःगु दु । सर्काया च्यागू दुजः राष्ट्र दथुइ बहुआयामिक स्वापूयात थुकी बः बियातःगु दु ।
भुटानया राजधानी थिम्पुया ग्रान्ड नेशनल एसम्बली भवनय् निन्हुन्यंक जूगु सम्मेलनया समापन यानादिसें सार्कया अध्यक्ष नापं भुटानया प्रधानमन्त्री जिग्मे वाई थिन्लें सर्कायात दक्षिण एशियाया आर्थिक विकास लगायतया विषयलय् केन्द्रीत यायेमाःगु धयादिल ।
झिंन्हय्क्वःगु शिखर सम्मेलन माल्दिभ्सया राजधानी मालेलय् सन् २०११य् जुइगु जूगु दु । सम्मेलनय् सार्क देय्या पाखें ग्वसाः देय्यात सुभाय् बियादिसें माल्दिभ्सया राष्ट्रपति मोहम्मद नसिदं मेगू दँय् माल्दिभ्सय् जुइगु झिंन्हय्क्वःगु शिखर सम्मेलनय् सार्कया नेतातय्त लसकुस यायेत थःपिं तयार जूगु धयादिल ।
