आन्दोलनया निंतिं छ्यलेत तयातःगु थीथी सामान ज्वन
प्रमुख प्रतिपक्षी दल एनेकपा (माओवादीं) यायेत्यंगु आन्दोलनया निंतिं छ्यलेत तयातःगु थीथी सामान प्रहरीं ज्वंगु दु । प्रहरीं बिहीवाः येँया सुन्धाराय् दुगु छगू गेष्ट हाउसं अज्या:गु सामान ज्वंगु खः । अज्याःगु सामान माओवादीं शनिवाः निसें यायेत्यंगु आन्दोलनयात ध्यानय् तयाः हःगु आशंका प्रहरीं याःगु दु ।
प्रहरीं विशेष सुचंया आधारय् बिहीवाः न्हिनय् सुन्धाराय् च्वंगु सेती महाकाली गेष्टहाउसय् छापा मारे याःगु इलय् प्यसः लिटर पेट्रोल, झिगू बोरा खाली बोत्तल, गुलेली छगू बोरा, गुच्चा निगू बोरा बरामद याःगु दु । अथेहे कैंची, काप आदि नं बरामद याःगु खँ प्रहरीं धाःगु दु ।
कुपण्डोलय् च्वनीम्ह कृष्ण घिमिरेया नांमय् बुक जूगु उगु कोठाय् अन वःपिंसं न्ययेगु खाना धकाः सामान हःगु खँ गेष्टहाउसया संचालन अजव पाण्डें प्रहरीयात बयान ब्यूगु दु । प्रहरीं आवश्यक अनुसन्धानया निंतिं पाण्डेयात नियन्त्रणय् काःगु दु ।
