आन्दोलन लितकायेत सत्तारुढ दलतय् इनाप
सत्तारुढ दलतय्सं प्रमुख प्रतिपक्षी दल एनेकपा (माओवादी)यात आन्दोलनया ज्याझ्वः लितकायेत इनाप याःगु दु । बिहीवाः च्वंगु सत्तारुढ दलतय् बैठकं संवाद व सहकार्य पाखें हे निकास मालेफइगु धासें आम हड्ताल लितकायेत माओवादीयात इनाप याःगु दु ।
माओवादीया आन्दोलनं चालू शान्ति प्रकृया व संविधान च्वयेगु ज्याय् लिच्वः लाकीगु नं बैठकं धाःगु दु । बैठकय् सत्तारुढ चीचीढंगु दलं माओवादीं मजदुर दिवसया कन्हय् कुन्हु निसें याये धाःगु आन्दोलन स्वयां न्ह्यः हे सहमतिया कुतः यानाः वार्ता पाखें समस्या ज्यंकेत सरकारनाप इनाप याःगु दु ।
बैठक लिपाः कार्यवहाक प्रधानमन्त्री विजयकुमार गच्छदारं माओवादीं सतकय् वयाः आन्दोलन यायेवं सरकार परिवर्तन जुइमफइगु धयादिल । नापं वय्कलं दबाव व धम्कीं सत्ता कब्जा यायेगु माओवादी रणनीति छुं नं हालतं सफल मजुइगु धयादिल ।
अथेहे नेपाली कांग्रेसया नेता अर्जुननरिसंह केसीं संवाद व सहकार्यं हे सहमति मालेमाःगु थासय् माओवादीं आन्दोलन यायेत्यंगु आपत्तिजनक खँ जूगु धयादिसें सतकं सरकार परिवर्तन सम्भव मजूगु कनादिल ।
अथेहे थौं हे सत्तारुढ मधेशवादी दलया जक बिस्कं च्वंगु बैठकं नं माओवादीयात आन्दोलन लितकायेत इनाप याःगु दु । मधेशी जनअधिकार फोरम (लोकतान्त्रिक), तराई मधेश लोकतान्त्रिक पार्टी व नेपाल सदभावनां माओवादीया आन्दोलन नापं मधेशया मुद्दाया बारे नं सहलह जूगु खः ।
