आन्दोलन शान्तिपूर्ण दयेकीगु बारे माओवादीया सहलह
एकीकृत नेकपा (माओवादीं) थःपिनिगु घोषित आन्दोलन शान्तिपूर्ण दयेकीगु बारे सहलह याःगु दु । बिहीवाः सुथय् पार्टी केन्द्रीय पदाधिकारीतय् बैठकं आन्दोलनयात शान्तिपूर्ण दयेकेत कार्यकर्तातय् परिचालनय् विशेष ध्यान बीगु खँ क्वःछिउगु दु ।
अथेहे बैठकं सरकारं आन्दोलनयात दमन यायेगु तयारी यानाच्वंगु निष्कर्ष पिकासें शान्तिपूर्ण आन्दोलन यायेगु अधिकारयात कुण्ठित मयायेत सरकार नाप इनाप याःगु दु । बैठकं माओवादी कार्यकर्ता च्वनाच्वंगु थासय् प्रहरीं हस्तक्षेप याःगु न्ह्यथंसें अज्याःगु हस्तक्षेप मयायेत नं इनाप याःगु दु ।
माओवादी आन्दोलनयात नियन्त्रणय् कायेत नेपाली सेनायात तकं छ्यले फइगु धकाः सार्वजनिक जुयाच्वंगु मन्त्रीतय् अभिव्यक्ति प्रति माओवादीं आपत्ति प्वंकूसें अज्याःगु ख्याच्वः शान्ति सम्झौता व अन्तरिम संविधान विपरित जूगु धासें सरकारया ध्यानकर्षण याकूगु दु ।
