ठोस निष्कर्ष बिना क्वचाल निर्णायक बहस
संवाद पाखें समाधान मालेगु स्वंगूलिं दलया प्रतिवद्धता
प्रमुख स्वंगू दल एकीकृत नेकपा (माओवादी), नेपाली कांग्रेस व नेकपा (एमाले)या नेतात दथुइ जूगु निर्णायक बहस छुं ठोस निष्कर्ष बिना क्वचाःगु दु । तर बैठकय् स्वंगूलिं दलं थःपिं संवादया मार्फत सहमति यायेगु प्रतिबद्धता प्वंकूगु दु ।
नेपाल उद्योग वाणिज्य महासंघया ग्वसाःलय् येँया होटेल याक एण्ड यतीलय् जूगु निर्णायक बहस ज्याझ्वलय् नेकपा एमालेया अध्यक्ष झलनाथ खनालं राष्ट्रिय सहमति जुसाः राष्ट्रिय सरकारया निंतिं एमाले प्रधानमन्त्रीया राजीनामा बीत तयार जूगु धयादिल । वय्कलं राजनीतिक दलत दथुइ सहमति जुसाः एमालें प्रधानमन्त्रीया राजीनामा तत्काल बीगु धयादिल ।
माओवादी अध्यक्ष पुष्पकमल दाहाल 'प्रचण्डं' राजनीतिक समस्या ज्यंकेत सरकारं लँ च्यायेकाबीमाःगु धयादिसें दलत गम्भीर जुयाः सहलह माफर्त सहमति याःसा आन्दोलन यायेमालीगु अवस्था मवइगु धयादिल । वय्कलं माओवादी नं आन्दोलन यायेगु पक्षय् मदुगु धयादिसें संवाद पाखें हे सहमति यायेत स्वःसां मेगू दलत गम्भीर मजूगु धयादिल ।
कांग्रेस कार्यवहाक सभापति सुशील कोइरालां माओवादीं हिंसा व आतंकया राजनीतिक मत्वःतुगु धयादिसें माओवादीं न्ह्यवलें छगू लिपा मेगू सर्त न्ह्यने हःगुलिं दलत दथुइ सहमति यायेत थाकूगु धयादिल । वय्कलं आः तकया सम्झौता कार्यान्वन मजूगुलिं नं समस्या वःगु धयादिसें माओवादीं आमहड्ताल लितकाःसा समस्या समाधानया निंतिं सकारात्मक वातावरण निमार्ण जुइगु धयादिल ।
स्वघौ तक न्ह्याःगु निर्णायक बहस मुख्यतया सेना समायोजन, शान्ति व संविधान व शक्ति बाँडफाँडया बारे सहलह जूगु ख: । उकी स्वंगू दलत दथुइ सेना समायोजनया व्याख्याया बारे हे मतभिन्नता खनेदत । माओवादी अध्यक्ष प्रचण्डं नेपाली सेनां त्याःगु व माओवादी सेनायात आत्मसमर्पण यायेत स्वःगुलिं शान्ति स्थापनाय् समस्या वःगु धयादिल ।
कांग्रेस नेता कृष्ण सिटौलां माओवादी लडाकुयात नेपाली सेनाय् समायोजन यायेगु धकाः गनं नं न्ह्यथंनामतःगु धयादिसें योग्यताया आधारय् माओवादी लडाकुयात थीथी सुरक्षा निकायलय् समायोजन व व्यवस्थापन यायेगु खँ जक दुगु धयादिल । अथेहे मेम्ह कांग्रेस नेता डा. रामशरण महतं सरकारया ध्यबा कयाच्वंपिं लडाकुत विशेष समिति अन्तर्गत जुइमाःगु खसां अझं माओवादीं उमित राजनीतिक तालिम बियाच्वंगु धयादिल ।
माओवादी उपाध्यक्ष डा. बाबुराम भट्टराईं सेना समायोजन व संविधान निर्माण यायेगु ज्या नाप नापं जुइमाःगु धयादिसें संविधान न्हापा च्वयेगु वा सेना समायोजन न्हापा यायेगु धइगु बारे गनं नं न्ह्यथंनामतःगु धयादिल । नापं वय्कलं आरोप प्रत्यारोप यायेगु स्वयां वस्तुसंगत ढंगं समस्या समाधान यायेगु पाखे वनेमाःगु धयादिल ।
माओवादीया वरिष्ठ उपाध्यक्ष मोहन वैद्यं समस्या सामाधान गुकथं यायेगु पाखे मवंसें म्वाः मदुगु खँल्हासाः समस्या अझ अप्व तच्वइगु धयादिसें सहमति निर्माण यानाः न्ह्यास् वनेमाःगु धयादिल ।
अथेहे एमाले महासचिव ईश्वर पोखरेलं कानुन सम्मत ढंगं समस्याया समाधान मालेमाःगु तर आः नं धम्कीया भरय् आन्दोलन यायेत माओवादीं स्वयाच्वंगु धयादिल । वय्कलं माओवादी विद्यार्थी संगठनं थंज्याःगु हे धम्की बियाः निजी विद्यालय बन्द यानाः आन्दोलनया निंतिं थःपिनिगु कार्यकर्तात तयातःगु धयादिल । एमाले सचिव युवराज ज्ञवालीं नेपाली सेना व माओवादी सेना निगूलिं बराबर मजूगु धयादिसें माओवादीं हिंसा त्याग मयाःगुलं हे शान्ति स्थापनाय् समस्या वःगु द्वपं बियादिल ।
वाणिज्य महासंघं याःगु ज्याझ्वलयात थीथी संचार माध्यमं प्रत्यक्ष प्रक्षारण याःगु खः । नेपाल मिडिया सोसाइटी, टेलिभिजन ब्रोडकास्टर्स नेपाल, नेपालया स्वतन्त्र रेडियो, नेपाल चेम्बर अफ कमर्श व होटल एशोसिएसन अफ नेपालया ग्वाहालिइ थुगु ज्याझ्व: जूगु खः ।
