संवाद पाखें निकास मालेत कांग्रेस व एमालेया इनाप

सत्तारुढ नेपाली कांग्रेस व नेकपा (एमालें) प्रमुख प्रतिपक्षी दल एनेकपा (माओवादी)यात वर्तमान राजनीतिक समस्याया समाधान संवाद पाखें मालेत इनाप याःगु दु ।

माओवादीं मजदुर दिवसया कन्हय् कुन्हु निसें यायेत्यंगु अनिश्चितकालीन आमहतालया बारे सहलह यायेत एमाले पार्टीया मू ज्याकू बल्खुइ बुधवाः च्वंगु सत्तारुढ निगू दलया बैठक च्वंगु खः । उगु बैठकं माओवादीयात आन्दोलन पाखें समस्याया समाधान मजुइगु व उकीं समस्या अझ अप्वइगु धासें संवाद पाखें सहमति मालेत इनाप याःगु दु ।

अथेहे निगू दल दथुइ थःपिनिगु दल आबद्ध विद्यार्थी संगठनत दथुइ जुयाच्वंगु ल्वापुया बारे नं सहलह जूगु खः । अज्याःगु ल्वापुं सत्ता गठबन्धन व सरकारयात नापं थाकूगु अवस्थाय् लाकीगु धासें निगू विद्यार्थी संगठन दथुइया समस्या सहलह मार्फत ज्यंकेगु निर्णय याःगु दु ।