जनतां चाहेजुसाः राजतन्त्र वयफु : पारस शाह

पुलांम्ह युवराज पारस शाहं जनतां चाहे जुसाः नेपालय् हानं राजतन्त्र वयेफुगु खँ धयादीगु दु ।

बुधवाः वीरगञ्जय् सामुदायिक आँखा अस्पतालया उल्लेज्या लिपा पत्रकारत नाप खँल्हाबंला यानादिसें वय्कलं संस्था धइगु व्यक्तिगत खँ मजूगु धयादिसें जनतां चाहेजुसाः राजसंस्था पुर्नस्थापित जुइफइगु धयादिल ।

न्हापा निसें राजसंस्थां जनताया निंतिं ज्या यानावःगु व शान्तिया निंतिं राजसंस्थां त्याग याःगु धयादिसें जनताया चाहना कथं न्ह्याः वनेगु धयादिल । तर वय्कलं राजसंस्था नेपालय् पुर्नस्थापना जुसां व्यक्तिगत रुपं थः जुजु जुइ चाहे मजूगु धयादिल ।

देय्या अवस्था हिंसात्मक जुयावंगु टिप्पणी यानादिसें पारसं नेपालय् शान्ति व विकास माःगु व शान्ति जुया विकास पाखे न्ह्याः वनेमाःगु धयादिल ।