अनमिन प्रमुखं भट्टराईयात नापलात
नेपाः स्थिति संयुक्त राष्ट्रसंघीय मिसन अनमिनया प्रमुख करिन ल्यानग्रेनं एनेकपा (माओवादीं) मजदुर दिवस निसें यायेत्यंगु आन्दोलनया बारे च्यूताः प्वंकादीगु दु ।
मंगलवाः माओवादी उपाध्यक्ष डा. बाबुराम भट्टराईयात नापलाना अनमिन प्रमुख ल्यानग्रेनं उगु च्यूताः प्वंकादीगु खः । भट्टराईं नं थःपिंसं घोषणा यानाःगु आन्दोलन शान्तिपूर्ण जूगु प्रतिबद्धता प्वंकादिल । वय्कलं थःपिंसं तःक्व हे आन्दोलन शान्तिपूर्ण जुइगु धाःसां सरकारं थुकीयात मखुगु तरिकां प्रचार याःगु प्रति असन्तुष्टि प्वंकादिल ।
भट्टराई निवास शान्तिनगरय् जूगु खँल्हाबंलाय् ल्यानग्रेनं मंगलवाः माओवादी कमाण्डरयात ग्रिनेड सहित ज्वंगु बारे नं च्यूताः प्वंकादीगु खः । लिसःलय् भट्टराईं ज्वंम्ह कमाण्डर छेँ वनेत बिदा कयाः शिविरं पिहां वंगु धयादिसें ग्रिनेडया बारे धाःसा अनभिज्ञता प्वंकादिल ।
अथेहे वय्कलं थःपिं बिस्तृत शान्ति सम्झौता प्रति प्रतिबद्ध जूगु धयादिसें सुंनं लडाकुत ल्वाभः सहित शिविरं पिहांवये मदुगु धयादिल । उगु इलय् भट्टराईं नेपाःया शान्ति प्रकृया पूमवंतल्ले नेपालय् अनमिनया आवश्यकता दुगु नं धयादिल ।
