मेम्ह मन्त्रीया नं सेना परिचालन जुइफुगु धापू
सूचना व संचार मन्त्री नापं सरकारया प्रवक्ता शंकर पोखरेलं माओवादीं यायेत्यंगु आन्दोलन हिंसात्मक जुसाः सेना परिचालन जुइफु धकाः धयादीगु छुं दिं लिपा हे मेम्ह मन्त्रीं नं माओवादीया आन्दोलन नियन्त्रणय् कायेत सेना परिचालन जुइफुगु अभिव्यक्ति बियादीगु दु ।
बुधवाः वीरगंजय् जूगु छगू साक्षात्कार ज्याझ्वलय् उद्योग मन्त्री महेन्द्रप्रसाद यादवं माओवादीं यायेगु धाःगु आन्दोलन उत्तेजक जुसाः उकीया विरुद्ध सरकारं सेना परिचान यायेगु ख्याच्वः बियादिल । वय्कलं माओवादी प्रदर्शन उग्र जुयाः वंसा व जनता भयभित व त्रसित जूगु खण्डय् सरकारं अज्याःगु निर्णय कायेफइगु सम्भावना दुगु धयादिल ।
वय्कलं माओवादी शान्ति प्रकृया स्वयां नं सरकार निर्माणय् लगे जुयाच्वंगु धयादिसें माओवादीं जनतायात न्हूगु संविधान निर्माण जुइगु अवसरपाखें वञ्चित यानाच्वंगु द्वपं बियादिल । विस्तृत शान्ति सम्झौताय् खुलाःया दुने हे माओवादी लडाकु समायोजन जुयमाःगु खँ दुगु खःसां माओवादीया हे कारणं आः तक नं लडाकु समायोजन जुइमफुगु धयादिल ।
वर्तमान अवस्थाय् स्वंगू तःधंगु दलया सहमति आवश्यक जूगु धयादिसें मन्त्री यादवं वर्तमान गतिरोध व परिस्थितिया जिम्मेवार नं वहे स्वंगू दल जूगु द्वपं बियादिल । वर्तमान गतिरोध चीकेगु निंतिं सरकार बाधक मजूगु धयादिसें वय्कलं राष्ट्रिय सहमतिया निति प्रधानमन्त्री नं बाधक मजूगु टिप्पणी यानादिल ।
वय्कलं माओवादी सेनाया व्यवस्थापन, रज्या पुनर्संरचना, वाईसीएलया अर्ध सैन्य संरचना विघटन व राज्यया शासकीय स्वरुप हाल देशय् प्यंगू प्रमुख मुद्दा दुगु धयादिसें थुगु प्यंगू मुद्दाय् दुगु मतान्तरया अन्त्य यानाः सहमतिय सरकार निर्माण यायेमाःगु धयादिल ।
