राष्ट्रपति पाखें राजनीतिक समस्या ज्यंकेगु निंतिं बेलि भ्वय्
भ्वय्लय् माओवादी अनुपस्थित
न्हूगु संविधान जारी यायेत लच्छि जक ल्यंदनीगु इलय् माओवादीं आन्दोलनया घोषणा यायेवं सहमतिया पहल यायेत राष्ट्रपति डा. रामवरण यादवं मंगलवाः बहनी बेली भ्वय्या ग्वसाःग्वयादीगु दु ।
राष्ट्रपति भवन शितल निवासय् ग्वसाःग्वःगु बेलि भ्वय्लय् संविधानसभालय् दुथ्याःगु नीन्यागूलिं दलयात सःतुगु खःसां माओवादीं धाःसा उकी ब्वति मका: । माओवादीं थःपिनिगु आन्दोलन राष्ट्रपति विरुद्ध केन्द्रीत जूगुलिं बेलि भ्वय्लय् वनेगु औचित्यहीन जुइगु खँ धासें बेलि भ्वय्लय् मवनेगु निर्णय याःगु खः ।
बेलि भ्वय्लय् माओवादीया पाखें अध्यक्ष पुष्पकमल दाहाल 'प्रचण्ड', उपाध्यक्षत डा. बाबुराम भट्टराई व नारायणकाजी श्रेष्ठ 'प्रकाश'यात ब्वंगु खः । अथेहे नेपाली कांग्रेस व नेकपा (एमाले) पाखें नं स्वम्ह-स्वम्ह व मेगू दल पाखें निम्ह-निम्ह व चीचीधंगु दलया छम्ह शीर्ष नेतातय् ब्वंगु खः ।
राष्ट्रपतिया बेलि भ्वय्लय् कार्यवाहक प्रधानमन्त्री विजयकुमार गच्छदार, कांग्रेस बरिष्ठ नेता शेरबहादुर देउवा, कार्यवाहक सभापति सुशील कोइराला, संसदीय दलया नेता रामचन्द्र पौडेल, एमाले अध्यक्ष झलनाथ खनाल, मधेसी जनअधिकार फोरमया अध्यक्ष उपेन्द्र यादव, पुलाम्ह प्रधानमन्त्रीत सूर्यबहादुर थापा व लोकेन्द्रबहादुर चन्द, तमलोपाया अध्यक्ष महन्थ ठाकुर लगायत नेतातय् उपस्थित दु ।
