सेना नं परिचालन जुइफु : मन्त्री पोखरेल
सूचना व संचार मन्त्री नापं सरकरया प्रवक्ता शंकर पोखरेलं माओवादीं वैशाष १८ गते निसें यायेत्यंगु आन्दोलन हिंसात्मक जुसाः सेना तकं परिचालन जुइफुगु खँ धयादीगु दु ।
मंगलवाः प्रेस चौतारी नेपाल सुनसरीं इटहरीलय् याःगु पत्रकार सम्मेलनय् जनपथ व सशस्त्र प्रहरीं हिंसात्मक आन्दोलन पनेमफुसाः सेना परिचालन जुइगु धयादिल । सरकारं दक्वं सुरक्षा निकाययात हाई अलर्टय् च्वनेत निर्देशन बिधुंकाःगु धयादिसें पोखरेलं माओवादीया आन्दोलन असामान्य जुसाः नियन्त्रण यायेत सरकारं छुं नं कसर मत्वःतीगु धयादिल ।
वय्कलं माओवादी आन्दोलन शान्ति वं संविधान विपरित जूगु धयादिसे कानुन पालना यायेत सरकारं न्ह्याःगु कथंया सामना यायेत नं तयार जूगु धयादिल । आन्दोलनं समस्या समाधान मखसें संकट जक ब्वलंकीगु धयादिसें संचार मन्त्री पोखरेलं माओवादीयात सहमति व सहकार्यया साथ न्ह्याः वनेत इनाप यानादिल ।
