नेविसंघया नेतायात त्वःतल
अनेरास्ववियु त्रिचन्द्र प्रारम्भिक कमिटिया अध्यक्ष समिक बडालयात खुकुरीं पाःगु द्वपंनय् ज्वनायंकूम्ह त्रिचन्द्र स्ववियु उपसभापति विष्णु पौडेलयात मंगलवाः प्रहरीं त्वःतुगु दु ।
वंगु चैत २९ गते क्याम्पसय् पौडेलं आक्रमण याःगु धकाः प्रहरीं ज्वनायंकेवं नेपाल विद्यार्थी संघं छुं न्हि न्ह्यः निसें आन्दोलन यानावयाच्वंगु खः । नेविसंघं थौं सनिलय् तक नं पौडेलया मत्वःतुसाः बहनी मसाल जुलुस पिकायेगु व कन्हय् स्वनिगः बन्द यायेगु ख्याच्वः ब्यूगु खः । पौडेलयात त्वःतेवं नेविसंघं मसाल जुलुस व स्वनिगः बन्दया ज्याझ्वः लितका:गु दु ।
थ्वस्वयां न्ह्यः मंगलवाः सुथय् चाबहीलय् नेविसंघया कार्यकर्ता व प्रहरी दथुइ अप्पां क्येकाः ल्वापू जूगु खः । उगु इलय् अप्पां लानाः नागरिकया फोटोपत्रकार विजय राई व राजधानीया फोटो पत्रकार अशोक महर्जन घाःपाः जूगु दु । प्रदर्शनकारीतय्त तितरवितर यायेत प्रहरीं झिंन्यागू राउण्ड अश्रुग्यास प्रहार याःगु खः ।
प्रदर्शनया झ्वलय् विद्यार्थीतय्सं खानेपानी संस्थानया बा. १. ब. ४९९७ नम्बरया मोटरसाइकल व मेगू छगः मोटरसाइकलय् मि च्याकाब्यूगु खः ।
