नेवाःतय्सं संविधानसभा भवन घेरे यानाच्वन
क्वःछिनातःगु इलय् हे संविधान जारी यायेमाःगु व नेवाःतय् अग्राधिकार सहित नेवाः स्वायत्त राज्यया सुनिश्चिता जुइमाःगु माग यासें नेवाःतय्सं संविधानसभा भवन घेरे यानाच्वंगु दु । थीथी राजनीतिक दलया भातृ संगठन व जातिय पुचः दुथ्याःगु नेवाः स्वायत्त राज्य संघर्ष समितिया आह्वानय् न्हिनसिया निताः इलं निसें संविधानसभा भवन घेराउ ज्याझ्वः न्ह्याःगु खः ।
आः संविधानसभा भवनयात पश्चिम, दक्षिण व उत्तरया गेटय् न्ह्यने च्वनाः स्वंगू थासं घेराउ यायेगु ज्या न्ह्यानाच्वंगु दु । थ्वस्वयां न्ह्यः येँया मरु व कोटेश्वर नापं यलया मंगपाखें नेवाः स्वायत्त राज्यया ध्वाँय सहित छगू तःजिगू जुलुस पिथनाः संविधानसभा भवन घेरे याः वःगु खः ।
नेवाःतय् संविधानसभा भवन घेराउ ज्याझ्वलय् एक्यबद्धता प्वंकूसें नेपाल आदिवासी जनजाति महासंघ व संघीय परिषदं नं संविधानसभा घेराउ ज्याझ्वलय् ब्वति काःगु दु । महासंघ व परिषदं न्हिनय् छताः इलय् माइतीघर मण्डलां जुलुस पिथनाः संविधानसभा भवन न्ह्यने थ्यंकूगु खः ।
न्हिनसिया प्यताः ई तक न्ह्याइगु संविधानसभा भवन घेराउ ज्याझ्वः लिपाः संविधानसभा अध्यक्ष सुवाष नेम्वाङयात नेवाः स्वायत्त राज्यया सुनिश्चितता नापं इलय् हे न्हूगु संविधान जारी यायेमाःगु माग दुथ्याःगु ज्ञापनपत्र लःल्हायेगु ज्याझ्वः दु ।
