धम्कीपूर्ण व उत्तेजनात्मक अभिव्यक्ति दिकेत आयोगया इनाप
राष्ट्रिय मानवअधिकार आयोगं माओवादीं देय्या थीथी थासय् घरेलु ल्वाभः सहितया सुरक्षा तालिम व थीथी दलया जिम्मेवार नेतातय्सं ब्यूगु धम्कीपूर्ण अभिव्यक्तिं जनतायात भयभित याःगु धासें संवाद पाखें राजनीतिक सहमति कायम यायेत इनाप याःगु दु ।
आयोगं मंगलवाः छगू विज्ञप्ति पिथनां राजनीतिक दलया कार्यकर्तात पाखें अपराधिक ल्वापु व आक्रमणया गतिविधित अप्वयाच्वंगु प्रति च्यूताः प्वंकुसें सरकार व सम्बन्धित निकायतय्सं जनतायात शान्तिपूर्ण व निर्भयतापूर्वक म्वाये दइगु खँय् आश्वस्त यायेमफुगु खँय् तकं च्यूताः प्वंकूगु दु ।
संविधान निर्माण यायेगु ई लच्छि जक ल्यँ दनीगु महत्वपूर्ण क्षणय् राजनीतिक तह पाखें दकलय् अप्व असमझदारी व दूरी अप्वःगु धासें आयोगं संविधान निर्माणया ज्या याकन पूवंकेत संविधानसभाय् प्रतिनिधित्व याइगु दक्वं राजनीतिक दलत विशेष यानाः सत्तापक्ष व प्रमुख प्रतिपक्ष दथुइ उच्च समझदारी, सहमति व सहकार्य जुइमाःगु खँय् आयोगं बः ब्यूगु दु ।
लिप्पांगु इलय् मुख्य राजनीतिक दलया नेतातय्सं ब्यूगु उत्तेजनात्मक अभिव्यक्ति लगायतया खँया कारणं असमझदारीं मुक्कं शान्ति प्रकृया व संविधान निर्माणया ज्या तकं अवरुद्ध वनाच्वंगुलिं जनता त्रसित व निराश जुइमाःगु स्थिति ब्वलंगु खँ आयोगं विज्ञप्तिइ न्ह्यथंनातःगु दु ।
अथेहे आयोगं संवादपाखें राजनीतिक सहमति कायम यानाः सर्वसाधारणय् खनेदुगु भयपूर्ण वातावरणयात तत्काल अन्त्य यायेत व जनप्रदर्शन थंज्याःगु गतिविधियात शान्तिपूर्ण दयेकेत, घरेलु ल्वाभः सहित तालिम, जबर्जस्ति चन्दा असुली, धम्की व ल्वापु थंज्याःगु गतिविधि तत्काल दिकेत सम्बन्धित पक्षया ध्यानाकर्षण या:गु दु ।
