सार्क शिखर सम्मेलनय् ब्वति कायेत प्रम भुटानय्
प्रधानमन्त्री माधवकुमार नेपाल झिंखुक्वःगु सार्क शिखर सम्मेलनय् ब्वति कायेत थौं भुटानया राजधानी थिम्पु झायादीगु दु । प्रधानमन्त्री नेपालं थुगु खुसिइया शिखर सम्मेलनय् जलवायु ह्यूपाः व सार्क देय् दथुइया सम्बन्ध अझं प्रगाढ दयेकेगु बिषयसं सहलह जुइगु धयादिल । प्रधानमन्त्री नेपाल पाकिस्तानी एअरलाइन्सं उखेपाखे झायादीगु खः ।
त्रिभुवन विमानस्थलया अति विशिष्ट कक्षय् सभामुख सुवास नेम्बाङ्, उपप्रधानमन्त्री विजयकुमार गच्छदार, पर्यटन नापं नागरिक उड्डयनमन्त्री शरदसिंह भण्डारीं विदाई यानादीगु खः ।
थ्वसिवें न्ह्यः प्रधानमन्त्री नेपालं माल्दिभ्सया राष्ट्रपति मोहम्मद नासिदनाप शिष्टाचार भेट यानादी । नापलायेगु भुवलय् कुटनीतिक नियोग पलिस्था यायेगु व निगू पक्षीय आर्थिक अवस्था सुदृढ यायेगु बिषयसं सहलह जुइगु धाःगु दु ।
न्हापांगु खुसिइ दक्षीण एशियाली क्षेत्रीय सहयोग संगठन सार्कया शिखर सम्मेलन ग्वसाग्वःगु भुटानं सम्मेलनया निंतिं फुक्क तयारी क्वचायेकूगु दु । राजधानी थिम्पु नापं सम्मेलनस्थल भम्चा थें समा याःगु दुसा सम्मेलन ज्वःछि सरकारं फुक्क ब्वनेकुथि बन्द याना पाहाँपिन्त लसकुस यायेत मस्तय्त खटेयाःगु दु । थिम्पु विमानस्थलय् सम्मेलनय् वईपं पाहाँया नां नापं विशेष पाहाँया तस्विर नापंया हेल्प डेस्क तयातःगु दु । थिम्पु विमानस्थलं सम्मेलनस्थलतक थ्यंकेत सवा घण्टा बिइगु जूगुलिं राजमार्ग नापं मू बजा क्षेत्रय् भव्य लसकुस ध्वाखा दयेकातःगु दु । अधीकारितय्सं थिम्पुइ जुयाच्वंगु तयारीयात आःतकया भव्य व व्यवस्थीत धाःगु दु ।
सरकारया आह्वानय् फुक्क उद्योग कलकारखानां तकं राष्ट्रिय उत्सवया रुपय् बन्द याःगु दु । राजधानी थिम्पुइ चलेजुइगु सिमित गाडीयात जक राज्यं विशेष नम्वर जारी याःगुलिं मेगु गाडी बन्द याःगु दु ।
थ्वसिवें न्ह्यः अनया युवराजया राज्यभिषेकया इलय् जक भुटान सरकारं थुकथं तयारी याःगु खः । झिंखुक्वःगु सार्क शिखर सम्मेलनय् ब्वति कायेत नेपाःया प्रधानमन्त्री माधवकुमार नेपाल नापं माल्दिभ्सया राष्ट्रपति मोहम्मद दसिद थौं सुथय् विशेष विमानं थिम्पु झायादीगु दुसा येँ च्वनादीम्ह पाकिस्तानया प्रधानमन्त्री नं थौं हे थिम्पु थ्यंकादी ।
