कन्हय् नेवाःतय्सं संविधानसभा घेराउ याइगु
संविधान इलय् हे जारी जुइ वा मजुइ धकाः जनताय् आशंका अप्वयाच्वंगु इलय् नेवाःतय्सं कन्हय् न्हूगु संविधान क्वःछिनातःगु इलय् हे जारी यायेमाःगु माग यासें संविधानसभा भवन घेराउ यायेत्यंगु दु ।
न्हूगु संविधानय् नेवाःतय् अग्राधिकार सहित नेवाः स्वयात्त राज्यया सुनिश्चितता, जातीय स्वशासन नापं आत्मनिर्णयया अधिकार दयेमाःगु, ऐतिहासिक नेपालमण्डलया नेवाः बाहुल्यता दुगु लागायात नेवाः स्वयत्त प्रदेशय् दुथ्याकेमाःगु माग यासें नेवाः स्वयत्त मंकाः संघर्ष समितिया आह्वानय् कन्हय् संविधानसभा घेराउ ज्याझ्वः जुइत्यंगु खः ।
थ्वहे दथुइ कन्हय्या घेराउ ज्याझ्वः ताःलाकेत संघर्ष समितिं सोमवाः बहनी येँया असनं मसाल जुलुस पिकाःगु दु । उगु जुलुस कुमारी खः सालीगु लागा चाहिला: कन्हय्या ज्याझ्वलय् ब्वति कायेत सकल नेवा:तय्त इनाप या:गु दु । अथेहे सोमवा: सुथय् कन्हय्या संविधानसभा घेराउ ज्याझ्वलय् ब्वति कायेत इनाप यासें थाय्मरुं मोटरसाइकल र्याली पिकाःगु खः । उगु र्याली येँया थीथी थाय् चाहीला: मरुइ क्वचाःगु खः ।
संघर्ष समितिं कन्हय् निताः इलय् यायेत्यंगु घेराउ ज्याझ्वलय् ब्वति कायेत येँया जःखः व किपूलिइ च्वंपिं नेवाःतय्त मरुइ मुनाः जुलुस पिकासें संविधानसभाया पश्चिम गेटय् घेराउ यायेत, यल व जःखः लागायापिं मंगलय् मुनाः जुलुस पिकासें संविधानसभाया दक्षिण गेटय् घेराउ यायेत व ख्वप, थिमि लागायापिं नेवा:त गौशालाय् मुनाः जुलुस पिकासें संविधानसभाया उत्तरपाखे च्वनाः घेराउ यायेत इनाप या:गु दु ।
नेवाःतय्सं कन्हय् यायेत्यंगु संविधानसभा घेराउ ज्याझ्वःयात एक्यबद्धता प्वंकूसें नेपाल आदिवासी जनजाति महासंघं सकल जनजातितय्त कन्हय् छताः इलय् थीथी थासं जुलुस पिथनाः न्हूगु बानेश्वरय् जम्मा जुयाः संविधानसभा घेराउ यायेत आह्वान याःगु दु ।
(किपा: - उदेन न्हूसाय्मि)
