स्वंगू दलया बैठकय् सहमति जुइमफुत
संविधानसभाया प्रमुख स्वंगू दलत एकीकृत नेकपा (माओवादी), नेपाली कांग्रेस व नेकपा (एमाले) दथुइ राजनीतिक गतिरोध चीकेत सोमवाः सनिलय् च्वंगु बैठक बिना निष्कर्ष क्वचाःगु दु ।
प्रधानमन्त्री माधवकुमार नेपालं माओवादी आन्दोलन व राजनीतिक गतिरोध ज्यंकेगु निंतिं सःतुगु बैठकय् प्रधानमन्त्री नेपालं थः राष्ट्रिय सहमतिया निंतिं बाधक मजुइगु धयादिसें माओवादीयात आन्दोलन लितकयाः संवादया मार्फत समस्या समाधान यायेत इनाप यानादीगु खः ।
उगु इलय् माओवादीं प्रधानमन्त्री नेपालं समस्या ज्यंकेत ठोस प्रस्ताव ह्येमफुगुलिं आन्दोलन लितमकायेगु खँ धाःगु खः । तर बैठकय् स्वंगू दलत दथुइ माओवादीं वैशाष १८ गते निसें यायेत्यंगु आन्दोलन न्ह्यः हे गतिरोध समाधान यायेत अधिकतम कुतः यायेगु सहमति जूगु दु ।
येँया होटेल र्याडिसनय् जूगु बैठकय् माओवादीपाखें अध्यक्ष प्रचण्ड, वरिष्ठ उपाध्यक्ष मोहन वैद्य, उपाध्यक्षत डा. बाबुराम भट्टराई व नारायणकाजी श्रेष्ठ, विदेश विभाग प्रमुख कृष्ण बहादुर महरा लगायतया ब्वति दुगु खःस कांग्रेसया कार्यवहाक सभापति सुशील कोइराला, वरिष्ठ नेता शेरबहादुर देउवा, उपसभापतित रामचन्द्र पौडेल व गोपालमान श्रेष्ठया ब्वति दुगु खः ।
अथेहे एमाले पाखें वरिष्ठ नेता नापं प्रधानमन्त्री माधवकुमार नेपाल, अध्यक्ष झलनाथ खनाल, वरिष्ठ नेता केपी शर्मा ओली, उपाध्यक्ष बामदेव गौतम व महासचिव ईश्वर पोखरेलया ब्वति दुगु खः ।
