१९ गते निसें माओवादीया अनिश्चितकालीन आमहड्ताल
एकीकृत नेकपा (माओवादीं) वैशाष १९ गते निसें देय्न्यंक अनिश्चिकालीन आमहड्तालया घोषणा याःगु दु ।
सोमवाः येँय् छगू पत्रकार सम्मेलनया ग्वसाःग्वःया माओवादीं सामान्य आन्दोलनयात सरकारं ध्यान मब्यूगुलिं अनिश्चितकालीन हड्तालय् कुहांवयेमाःगु खँ धाःगु दु । माओवादीं मजदुर दिवसया झ्वलय् मे १ तारिख कुन्हु स्वनिगः लगायत देय्न्यंक जनप्रदर्शन यायेगु व वया कन्हय् कुन्हु निसें आमहड्ताल यायेगु निर्णय याःगु खः ।
पत्रकार सम्मेलनय् माओवादी अध्यक्ष पुष्पकमल दाहाल 'प्रचण्डं' शान्ति व संविधानया निंतिं वैशाष १९ गते निसें अनिश्चितकालीन राजनीतिक हड्ताल यायेमाःगु धयादिसें थ्व माओवादीया रहर मखसें बाध्यता जूगु धयादिल । वय्कलं आन्दोलन देय्न्यंया सदरमुकाम व शहर केन्द्रीत जुइगु धयादिल ।
वय्कलं माओवादीया आमहड्ताल शान्तिपूर्ण जुइगु धयादिसें उकीयात सरकारं दमन यायेत स्वःसा प्रतिकारय् कुहांवयेगु ख्याच्वः बियादिल । हड्तालया दथुइ नं सहमति व संवादया लुखा चालीगु खँ नं वय्कलं धयादिल । वय्कलं माओवादी हड्तालयात स्वक्व:गु जनआन्दोलनया कथं हे कायेत इनाप यानादिसें उद्योग, कलकारखाना, यातायात, शैक्षिक संस्था आदि बन्द याना: ग्वाहालि यायेत इनाप यानादिल ।
पत्रकार सम्मेलनय् प्रधानमन्त्री माधवकुमार नेपाल प्रति तसकं आक्रोशित खनेदुम्ह प्रचण्डं माधव नेपालं प्रधानमन्त्री नियुक्त याइगु खःला धकाः न्ह्यसः तयादिल । प्रधानमन्त्री सु जुइगु धकाः खँ तःसा थःपिंसं उकीयात तप्यंक अस्वीकार यायेगु धयादिसें प्रचण्डं नांलय् मखु इस्युलय् सहमति यायेमाःगु धयादिल ।
