थौं सुथय् मोटरसाइकल र्याली, बहनी मसाल जुलुस
वैशाख १४ गते संविधानसभा घेराउ
येँ (सन्ध्या टाइम्स)/नेवाः स्वायत्त राज्य मंकाः संघर्ष समितिं कन्हय् जुइगु संविधानसभा घेराउ ज्याझ्वः ताःलाकेत थौं सुथय् थाय्मरुं छगू मोटरसाइकल र्याली पिकाल। उगु र्याली क्षत्रपाटी, सामाखुसि, अस्कल क्याम्पस, महाराजगंज, वालुवाटार, नक्साल, गौशाला, वानेश्वर, रामशाहपथ, कलिमाटी, वाफल, तख्ति, भिंद्यःत्वाः जुयाः मरुइ क्वचायेकूगु खः ।
मेखे थौं हे बहनी असनं मसाल जुलुस नं पिकाइगु ग्वसाः दु। उगु जुलुस कुमारी खः सालीगु थःने-क्वःने लागा चाःहिली।
कन्हय् संविधानसभा घेराउ ज्याझ्वः कथं संघर्ष समितिं स्वंगू थासय् च्वनाः संविधानसभा घेरे याइगु ग्वसाः दु। किपू व येँया जःखः च्वंपिं नेवाःत मरुइ मुनाः जुलुस पिकासें संविधानसभाया पश्चिम गेटय् घेराउ यायेगु, यल व जःखः लागायापिं मंगलय् मुनाः जुलुस पिकासें संविधानसभाया दक्षिण गेटय् घेराउ बीगु अले ख्वप, थिमि लागायापिं गौशालाय् मुनाः जुलुस पिकासें संविधानसभाया उत्तरपाखे च्वनाः घेराउ याइगु ज्याझ्वः दु ।
कन्हय् सनिलया २ बजेनिसें ५ बजे तक थ्व घेराउ जुइसा ४ बजेपाखे संविधानसभाया अध्यक्ष सुवास नेम्वाङयात नापलानाः नेवाः स्वायत्त राज्यया सुनिश्चितता सहितया न्हूगु संविधान पाय्छि इलय् हे जारी यायेमाः धइगु माग दुगु छगू ज्ञापनपत्र लःल्हायेगु ज्याझ्वः नं दु। घेराउ जुयाच्वनीगु इलय् स्वंगू हे थासय् दयेकातःगु दबुली च्वनाः न्वचु बीगु नापं सांस्कृतिक ब्वज्याया ज्याझ्वः जुइगु खँ धाःगु दु। थ्वहे खँ जानकारी बीत मंकाः संघर्ष समितिं धाःगु दु ।
घेराउ ज्याझ्वः अतिकं शिष्ट जुइ
नेवाःतय्सं कन्हय् याइगु संविधानसभा घेराउ ज्याझ्वः अतिकं शिष्ट व शान्तिपूर्ण जुइगु खँ नेवाः स्वायत्त राज्य मंकाः संघर्ष समितिं न्ह्यथंगु दु। संघर्ष समिति झिंछगू घटक दुसां कन्हय्या ज्याझ्वलय् नेवाः राज्यया जक ध्वाँय् ज्वना वयेत निर्देशन बियातःगु दु। कन्हय् स्वनिगलं पिनें नं आपालं नेवाः कार्यकर्तातय्सं ब्वति काइगु खँ धाःगु दु। ज्याझ्वलय् गुलिखे पुचःतय्सं बाजं थानाः धुन्या समेत ज्वनाः ब्वति कायेगु तयारी यानाच्वंगु दु। ज्याझ्वलय् ब्वति कायेत इनाप यासें स्वनिगःन्यंकं व्यापक पोस्टरिंग व माइकिंग जुयाच्वंगु दु ।
