सरकार विघटन यायेमाः - एमाले सभासद्
येँ (सन्ध्या टाइम्स)/माधवकुमार नेपालया हे नेतृत्वय् दुगु वर्तमान सरकार ल्यनाच्वन धाःसा नेकपा (एमाले) यात हे घाटा जुइगु खँ एमालेया सभासदतय्सं धाःगु दु ।
थःगु हे पार्टीया नेता नेपालया नेतृत्वय् दुगु सरकार दयाच्वंत्तले सहमति मजुइगु नापं संविधान तकं दयेके मफइगु जुयाः सरकार विघटन यानाः राष्ट्रिय सहमतिया सरकार दयेकाः न्ह्याः वनेमाः धइगु पक्षय् एमालेया बहुमत सभासदपिं दु धकाः स्वयं एमालेया सभासदतय्सं नागरिक आन्दोलनया न्ह्यलुवातय्त कनादीगु खः ।
वर्तमान सरकार ल्यनाच्वंत्तले मेमेगु पार्टीयात मखु एमालेयात हे घाटा जुइगु जुयाः थःपिं नं थ्व खँय् गम्भीर जुया वनाच्वनागु नापं माःगु कथंया भूमिका म्हितेत तकं तयार दु धकाः एमालेया सभासदतय्सं धयादीगु खः। थ्व इलय् राष्ट्रिय सहमतिया सरकार दयेकाः न्ह्याः वने मफुत धाःसा ल्वापु तच्वया वनीगु नापं संविधान नं दयेके मफइगु ठहर यानाः एमालेया सभासदतय्सं म्हिगः सहलहया झ्वलय् संसदीय दलय् माःगु कथं भूमिका म्हितेत नागरिक आन्दोलनया न्ह्यलुवातय्त बचं बियाहःगु दु ।
