थौं मनमोहनया लुमन्ति
येँ (सन्ध्या टाइम्स)/नेकपा (एमाले)या पुलांम्ह अध्यक्ष मनमोहन अधिकारीया थौं झिंछक्वःगु लुमंति दिवस थीथी ज्याझ्वः यासें हनाच्वंगु दु। थौं सुथय् हे मनमोहन स्मृति प्रतिष्ठानं लाजिम्पाटय् वय्कःया झ्वाताय् स्वांमाः क्वखायेकाः तुच्चा ज्याझ्वः यात ।
नेपाःया वाम प्रजातान्त्रिक आन्दोलनया न्ह्यलुवा अधिकारीया नेतृत्वय् २०५१ सालय् नेपाःया इतिहासय् न्हापांखुसी कम्युनिष्ट प्रधानमन्त्री जुयादीगु खः। वय्कलं २०५६ सालय् थौंया हे न्हि कुन्हु मदुगु खः। विक्रम संवत १९७८ असार १५ गते वय्कः येँया लाजिम्पाटय् जन्म जूगु खःसा विराटनगरय् मजदूर आन्दोलनंनिसें राजनीति न्ह्याकादीगु खः ।
