थुगुसी सार्क संगठनया नीन्यादँ बुन्हि
येँ (सन्ध्या टाइम्स)/दक्षिण एशियाली देय्तय् संगठन सार्कया १६ क्वःगु शिखर सम्मेलन थुगुसी भूटानया राजधानी थिम्पुइ जुइत्यंगु दु। कंसंनिसें शुरु जुइगु थ्व सम्मेलन भूटानय् जुइत्यंगु न्हापांखुसी खः। थ्वहे दँय् सार्क सम्मेलन गठन जूगु नं नीन्यादँय् क्यनीगु जूगु दु ।
भूटानं थुगुसी सम्मेलनया नारा 'टुवार्डस् अ ग्रीन एण्ड ह्याप्पी साउथ एशिया' क्वःछिउगु दु। थ्व नाराया ल्वय्क थुगुसी अन छगू पर्यावरण सम्बन्धी सन्धि नं पारित जुइगु ग्वसाः दु। थ्व सन्धि कथं पर्यावरण संरक्षण सम्बन्धी सूचना, प्रविधि, व्यवस्थापन आदि कालबिल यायेगु ज्या जुइ। अथे हे वाणिज्य सम्बन्धी मेगु छगू सन्धि नं जुइगु खँ धाःगु दु ।
सन् १९८५ स नेपाः लगायत भारत, पाकिस्तान, श्रींलंका, बंगलादेश, भूटान व माल्दिभ्स जानाः थ्व संगठन स्वंगु खःसा २००७ य् अफगानिस्तान नं थुकी दुथ्यात। चीन, इरान, युरोपियन युनियन, जापान, दक्षिण कोरिया, अमेरिका व मरिससं थगुने पर्यवेक्षक जुयाः ब्वति काःगु खःसा थुगुसी अष्ट्रेलिया व वर्मां नं पर्यवेक्षकया रुपय् ब्वति काइ ।
