उदाय मृत्यु संस्कार बारे सहलह
येँ (सन्ध्या टाइम्स)/उदाय समाजया न्हूपिं पदाधिकारीतय्त ङत तुलाधर समितिं हनेज्या यात। समितिया नायः सागरमान तुलाधरया सभापतित्वय् जूगु उगु ज्याझ्वलय् उदाय समाजया नायः डा. रुपज्योति कसाः, संरक्षक द्रव्यमान सिं तुलाधर नापं मेपिं पदाधिकारी व सल्लाहकारपिं दीगु खः ।
वकुन्हु हे उदाय समाजया विधि व्यवहार सुधार सम्बन्धी छगू ज्याझ्वः नं जुल। समाजया नायः डा. रुपज्योति कसाःया सभापतित्वय् न्ह्याःगु उगु ज्याझ्वलय् लोचनतारा तुलाधरं 'उदाय जातिया मृत्यु संस्कारया म्यान्युल' न्ह्यब्वयादिल। उगु ज्यापौयात समाजया नायः डा. कसाः नापं स्वयम्भु तुलाधर, चैत्यरत्न स्थापित, अमृतमानसिं बनिया, शरद कसाः, आयुरत्न सिख्राकार, अमीर ताम्राकार, उत्तमराज शिलाकारपिंसं टिप्पणी यानादीगु खः। ज्याझ्वलय् विशेष पाहां स्वयम्भुरत्न वज्राचार्यं मृत्यु संस्कारया बारे कनादीगु खः ।
