आः डेपुटी गभर्नर खाली
येँ (सन्ध्या टाइम्स)/नेपाल राष्ट्र बैंकया गभर्नर नियुक्तिया खँय् एमाले व कांग्रेस दथुइ ब्वलंगु ताःहाकःगु विवाद लिपा बल्ल गर्भनर नियुक्ति जूगु दुसा वयां लिपा प्वनाच्वंगु डेपुटी गभर्नरया नियुक्तिइ उकथंया हे समस्या खने दयावःगु दु ।
नेपाल राष्ट्र बैंकया डेपुटी गभर्नर कृष्णबहादुर मानन्धरं वंगु चैत्रया न्हापांगु वालय् विदा कायेधुंकाः प्वनाच्वंगु उगु पदय् नियुक्तिया निंतिं गभर्नर डा. युवराज खतिवडां सुयात डेपुटी गभर्नर दयेकेगु धइगु तकं सिफारिस याये फयाच्वंगु मदु। गभर्नर नियुक्त जूगु बाःछिया दुने डेपुटी गभर्नर नियुक्त यायेमाःगु खःसां लछि दये धुंकाः नं नां तकं सिफारिस याये फयाच्वंगु मदुनि ।
स्रोतया कथं धाःसा उगु पदय् नियुक्तिया निंतिं राष्ट्र बैंकया विशिष्ट श्रेणीया कर्मचारीत केन्द्रय् ब्वाँय् जुइगु क्रम अप्वया वनाच्वंगु दु। डेपुटी गभर्नर नियुक्तिया निंतिं गभर्नरं निम्हेसिया नां सिफारिस याना छ्वयेमाःगु व उकी मध्ये छम्हेसित मन्त्रिपरिषदं नियुक्त यायेगु व्यवस्था दु। डेपुटी गर्भनर हे लिपा वइम्ह गभर्नरया निंतिं दाबेदार जुइगु जूगुलिं नं थुगु पदय् विशिष्ट श्रेणीया कर्मचारीतय् आकर्षण अप्वया वनाच्वंगु नं सीदुगु दु। डेपुटी गभर्नरया पदावधि न्यादँया जुइगु व वयां लिपा गभर्नर जुइगुलिं नं थुखेपाखे अप्वः आकर्षण अप्वया वनाच्वंगु छम्ह उच्च अधिकृतं न्ह्यथंगु दु ।
