राजनीतिक निकासया निंतिं महासंघया पहल
येँ (सन्ध्या टाइम्स)/ क्वःछिउगु दिनय् हे संविधान निर्माण व वर्तमान इलय् खने दयाच्वंगु राजनीतिक अस्थिरताया निकास निकासया निंतिं प्रमुख राजनीतिक दलयात नेपाल उद्योग वाणिज्य महासंघं दबाव बीगु जूगु दु ।
थन छगू अन्तर्क्रिया ज्याझ्वः यासें महासंघं प्रमुख राजनीतिक दल एकिकृत नेकपा (माओवादी), नेपाल कम्युनिष्ट पार्टी (एमाले) व नेपाली कांग्रेसयात शीर्षस्थ नेतातय्त छगू हे दबुली थनाः लिसः फ्वनीगु जूगु दु ।
उगु इलय् राजनीतिक दलया नेतातय्त जनतायात लिसः बीगु इलय् थप दबाव सिर्जना यायेगु निंतिं नेपाली टेलिभिजन च्यानलतपाखें नं प्रशारण याकेगु ग्वसाः दुगु जानकारी महासंघया अध्यक्ष कुशकुमार जोशीं बियादीगु दु।
उगु अन्तर्क्रियात्मक ज्याझ्वलय् महासंघया उपाध्यक्ष भाष्करराज राजकर्णिकारं राजनीतिक समस्या मू हा छु खः धइगु सीकाः दलयात जिम्मेवार यायेगु महासंघया योजना दुगु नं स्पष्ट यानादिल ।
ज्याझ्वलय् सहभागि उद्योगी व्यवसायीतय्सं देशय् चरम आर्थिक संकट ब्वलनीगु सम्भावना दुगु खँय् ध्यानाकर्षण यासें महासंघं राजनीतिक निकासया निंतिं नेतृत्वदायी भूमिका म्हितेमाःगु खँय् नं बः बिउगु खः ।
