माओवादीयात आन्दोलन लितकायेत झिगू दलया इनाप
सत्तारुढ झिगू दलं एकीकृत नेकपा (माओवादीं) मजदुर दिवसया न्हि कुन्हु यायेगु धाःगु आन्दोलन लितकायेत इनाप याःगु दु । नापं झिगू दलं यदि माओवादीं आन्दोलन लितमकासाः शान्ति सुरक्षा कायम यायेत आवश्यक पलाः ल्ह्वनेत सरकारयात सुझाव ब्यूगु दु ।
सोमवाः प्रधानमन्त्री माधवकुमार नेपालया संयोजनय् च्वंगु सत्तारुढ झिगू दलया बैठकं माओवादीं शान्ति सम्झौताया घोर उल्लंघन यानाः मुठभेडया स्थिति ब्वलंकूगु धासें सहमतिया पालना यायेत इनाप याःगु दु । माओवादीं सतकं सरकार हिलेत स्वःगु अधिनायकवादी चरित्र जूगु ठहर यासें बैठकं विस्तृत सम्झौता वपरित दक्वं ज्याखँ बन्द यायेत माओवादीया ध्यानाकर्षण याःगु दु ।
बैठकं माओवादीं हिंसा परित्याग यानाः नागरिक पार्टीइ रुपान्तरण जुसाः राष्ट्रिय सहमतिया सरकार लगायत दक्वं विकल्पय् सहलह यायेफइगु निष्कर्ष पिकाःगु दु । माओवादीयात लडाकु समायोजन कार्यतालिका प्रति जिम्मेवार जुयाः समायोजन व पुनःस्थापनाय् ग्वाहालि यायेत नं बैठकं इनाप याःगु दु ।
अथेहे बैठकं माओवादीं कब्जा यानातःगु छेँबुँ लितबित, वाइसिइलया अर्धसैन्य संरचना भंग यायेत नं माग याःगु दु ।
