माओवादी आन्दोलन बारे इयु व अमेरिकां च्यूताः प्वंकल
एकीकृत नेकपा (माओवादीं) थ्वहे वइगु मे १ तारिक कुन्हु जनप्रदर्शन यायेगु धकाः क्वःछिनातःगु ज्याझ्वःया बारे युरोपेली देय्या राजदूतत व अमेरिकी उपसहायक विदेशमन्त्रीं च्यूताः प्वंकूगु दु ।
युरोपया च्यागू देय्या राजदूत सोमवाः माओवादी ज्याकू थ्यंकाः अध्यक्ष पुष्पकमल दाहाल 'प्रचण्ड'यात नापलाना उगु च्यूताः प्वंकूगु खः । राजदूततय्सं माओवादीं मजदुर दिवसया लसताय् यायेगु धाःगु शक्ति प्रदर्शन लगायत शान्ति व व संविधान निर्माणया बारे च्यूताः प्वंकूसें दलत दथुइ सहमतिया लँपु पाखें राजनीतिक संकट समाधान यायेत माओवादीयात सुझाव ब्यूगु दु ।
उगु इलय् माओवादी अध्यक्षं मजदुर दिवसया लसताय् लोकतान्त्रिक मुल्य व मान्यता कथं हे थःपिंसं शान्तिपूर्ण जनप्रदर्शन यायेगु धयादिसें माओवादी शान्ति प्रकृया व संविधान निर्माणय् गम्भीर व इमान्दार जूगु खँ धयादिल ।
खँल्हाबंलाय् नर्वे, फ्रान्स, जर्मनी, संयुक्त अधिराज्य, फिनल्यान्ड, स्विटजारल्यान्ड नापं युरोपेली हाइकमिसनया प्रतिनिधितय् ब्वति दुगु खः ।
अथेहे युरोपेलि देय्या राजदूतत नापया खँल्हाबंला लिपाः माओवादी अध्यक्ष प्रचण्डयात अमेरिकी उपसहायक विदेशमन्त्री रोबर्ट ओ. ब्लेकं नापलानाः माओवादी आन्दोलनया बारे च्यूताः प्वंकादीगु खः । उगु इलय् नं प्रचण्डं थःपिनिगु आन्दोलन शान्तिपूर्ण जुइगु खँ धयादीगु खः ।
अथेहे वय्कपिं दथुइ नेपाः स्थित राष्ट्रसंघीय मिसन अनमिनया बारे नं सहलह जूगु दु । प्रचण्डं शान्ति प्रकृया पूमवंतल्ले अनमिनया म्याद तनेमाःगु पक्षय् माओवादी दुगु धयादिसें अनमिनयात प्राप्त पुलांगु म्याण्डेट कायम यासें न्हूगु म्याण्डेट बीगु बारे नं सहलह यायेत थःपिं तयार दुगु धयादिल ।
