संवैधानिक परिषद विरुद्ध प्रचण्डं सर्वोच्चय् रित दायर
एनेकपा (माओवादी)या अध्यक्ष पुष्पकमल दाहाल 'प्रचण्डं' संवैधानिक परिषदया निर्णय असंवैधानिक जूगु धासें परिषदं याःगु नियुक्ति बदर यायेत अन्तरिम आदेशया माग यासें आइतवाः सर्वोच्च अदालतय् रिट दायर यानादीगु दु ।
परिषदं शुक्रवाः प्यंगू संवैधानिक पदय् याःगु नियुक्तिलय् प्रमुख विपक्षी दलया हैसियतं थःगु सहमति व ब्वति मदुगुलिं उगु नियुक्ति कानुनसम्मत मजूगु जिकिर प्रचण्डं याःगु दु । रिटय् थः परिषदया दुजः जूगुलिं बैठकया बारे जानकारी दयेमाःगु व निर्णय प्रक्रियाय् ब्वति काये दइगु थःगु हक जूगु खँ प्रचण्डं रिटय् न्ह्यथंनातःगु दु ।
उगु रिटय् संवैधानिक परिषदया अध्यक्ष नापं प्रधानमन्त्री माधवकुमार नेपाल, अथेहे परिषदया दुज:त प्रधानन्यायाधीश रामप्रसाद श्रेष्ठ, व्यवस्थापिका संसदया सभामुख सुवाचन्द्र नेम्वाङ, उपप्रधानमन्त्रीत विजयकुमार गच्छदार व सुजाता कोइराला, रक्षामन्त्री विद्या भण्डारी, संसदी सुनुवाइ विशेष समिति, मुख्यसचिव माधवप्रसाद घिमिरे व परिषदं सिफारिस याःपिं दक्वं पदाधिकारीतय्त विपक्षी दयेकातःगु दु ।
