प्रमया सर्त पार्टी कुचाथलेगु षड्यन्त्र : वैद्य
एकीकृत नेकपा (माओवादी)या वरिष्ठ उपाध्यक्ष मोहन वैद्यं प्रधानमन्त्री माधवकुमार नेपालं माओवादी अध्यक्ष प्रचण्ड बाहेक मेम्ह नेताया नां वःसा थः राजीनामा बीत तयार जूगु धकाः वःगु अभिव्यक्ति पार्टी कुचाथलेगु षड्यन्त्र जूगु द्वपं बियादीगु दु ।
रिपोटर्स क्लबं येँय् आइतवाः याःगु साक्षात्कार ज्याझ्वलय् नेता वैद्यं प्रधानमन्त्रीं न्ह्यने हःगु न्हूगु सर्त पार्टीयात कुचाथलेगु कथं वःगु धयादिसें माओवादीं उकीयोत माने यायेमफइगु धयादिल । नापं वय्कलं माओवादी पाखें अध्यक्ष प्रचण्ड हे प्रधानमन्त्री जुइगु धयादिल ।
वय्कल वैशाष १८ गते निसें माओवादीं याइगु आन्दोलन मर्यादित, शिष्ट व शान्तिपूर्ण जुइगु धयादिल । वर्तमान सरकार विघटन मजुतल्ले संविधानसभाया म्याद थपया बारे सहलह मजुइगु धयादिसें वय्कलं राष्ट्रिय सहमतिया सरकार गठन जुसाः थुकीया बारे सहलह यायेफइगु धयादिल ।
आः अल्पमत व बहुमत पाखे लगे जुइगु ई मजूगु धयादिसें नेता वैद्यं दलत छप्पँ मजुसाः सुयां नं हित मजुइगु यथार्थ दुगुलिं सहमतिया आधारय् हे देय्या न्ह्याकेमाःगु खँय् ब: बियादिल ।
