सम्झौता पालना जुसाः इलय् हे संविधान : पौडेल
नेपाल कांग्रेस संसदीय दलया नेता रामचन्द्र पौडेलं शान्ति सम्झौता व अन्तरिम संविधानया मार्मयात दक्वं राजनीतिक दलं आत्मसात् याःसा इलय् हे संविधान जारी यायेत सम्भव जूगु खँ धयादीगु दु । वय्कलं दक्वं दलयात इमान्दार जुयाः शान्ति सम्झौता निसें जूगु सहमति पालना यायेत इनाप यानादिल ।
नेपाल विद्यार्थी संघ पाटन संयुक्त क्याम्पं आइतवाः ग्वसाःग्वःगु छगू ज्याझ्वलय् नेता पौडेलं दलत दथुइ न्हूगु ढंगं सहमति कायम यायेफुसाः २०६७ दुने हे न्हूगु संविधान जारी यायेफइगु धयादिसें अग्रगामी लोकतान्त्रिक संविधान जारी याये न्ह्यः हे शान्ति प्रकृयायात निष्कर्षय् थ्यंकेमाःगु धयादिल ।
देशय् जारी लिप्पांगु राजनीतिक गतिरोधया अन्त्य यायेत सरोकारवाला पक्षत छप्पँ जुइमाःगु धयादिसें वय्कलं स्वाधीनता, लोकतन्त्र व नेपाली जनताया हितया पक्षय् परिवर्तनयात परिणाममुखी दयेकेमाःगु खँय् बः बियादिल ।
वय्कलं हिंसा व आतंकवादयात थःगु जीवनशैली कथं नालाजूपिं माओवादीया कारणं प्रजातन्त्र सुदृढ जुइमफुगु द्वपं बियादिल । वय्कलं आःया इलय् अरोप प्रत्यारेप स्वयां जनचाहना कथं संविधान निर्माण, शान्ति प्रकृयायात निष्कर्षय् थ्यंकेगु व न्हापा याःगु दक्वं शान्ति सम्झौतात पालना याये आवश्यक जूगु धयादिल ।
