माओवादी पाखें संसदया बैठक बहिष्कार
प्रमुख प्रतिपक्षी दल एकीकृत नेकपा (माओवादीं) थीथी माग यासें आइतवाःया व्यवस्थापिका संसदया बैठक बहिष्कार याःगु दु ।
बैठक सुरु जुइवं न्ववानादिसें माओवादी उपाध्यक्ष नारायणकाजी श्रेष्ठ 'प्रकाशं' संवैधानिक परिषद्य् याःगु निर्णय असंवैधानिक जूगु व उगु निर्णय तत्काल लितकायेमाःगु माग यानादीगु खः । अथेहे वय्कलं शान्ति प्रकृया क्वःमायेकं राष्ट्रसंघीय मिसन अनमिनया आवश्यकता दुगु तर सरकारं अनमिनया म्याद तनेगु प्रक्रिया ज्या शुरु मयाःगु द्वपं बियादिल । नापं वय्कलं अनमिनया म्याद तनेत सरकार नाप माग यानादिल ।
अथेहे माओवादीं वैशाष १८ गते यायेगु धाःगु शान्तिपूर्ण आन्दोलनया बारे राज्यं हिंसात्मक जुइगु द्वपं ब्यूसें प्रचारवाजी याःगु धयादिसें वय्कलं अज्याःगु प्रचार मयायेत सरकार नाप इनाप यानादिल ।
वय्कलं न्ववायेगु क्वःचायेवं माओवादीं थःपिनिगु माग पूवंकेमाःगु धासें व्यवस्थापिका संसदया बैठक बहिष्कार याःगु खः । संसदया मेगू बैठक मंगलवाः निताः इलय् च्वनी ।
