गौरी अनन्त सिरपाः
यल/लोकसाहित्य परिषद्या पुलांम्ह नायः मदुम्ह हरिगोविन्द श्रेष्ठं तःदँ तक शोध यानाः तयार यानादीगु कृति 'मचा लोकम्ये' यात आः सफूया रुपय् पिकाःगु दु। उकुन्हु थनया नेपालभाषा केन्द्रीय विभागय् जूगु छगू ज्याझ्वलय् नेपालभाषा एकेदमिया उपकुलपति लक्ष्मण राजवंशीं उगु सफू विमोचन यानादिल ।
उगु हे ज्याझ्वलय् समाजसेवी विष्णुबहादुर श्रेष्ठं थः मांअबुया नामं नीस्वंगु 'गौरी अनन्त सिरपाः' निम्हेसित लःल्हायेगु ज्या जुल। २५ द्वः तकाया उगु सिरपाःया दां मध्ये १५ द्वः तका नेपाःया चर्या प्याखं सफू अंग्रेजीं अनुवाद यानाः पिथनेत लःल्हाःगु खःसा १० द्वः तका दां 'ध्वंच्वलेचिया बाखं: छगू अध्ययन' शोधया निंतिं ईश्वरमान महर्जनयात लःल्हाःगु खः ।
लोकसाहित्य परिषद्या नायः प्रा. प्रेमशान्ति तुलाधरया सभापतित्वय् जूगु उगु ज्याझ्वलय् परिषद्या संरक्षक नापं मेमेपिं नं विशिष्ट व्यक्तितय् उपस्थिति दुगु खः ।
ज्याझ्वलय् पाहां कथं झाःम्ह स्वामी योगी बालकृष्णानन्दं थःगु परम्हंश योग केन्द्रपाखें मदुम्ह हरिगोविन्द श्रेष्ठया नामं योग सम्बन्धी ज्याझ्वःत न्ह्याकेत छगू लाख तका दां तया बीगु घोषणा नं उगु सभाय् यानादीगु खः ।
